ჯანდაცვის მინისტრის, ეკატერინე ტიკარაძის განცხადებით კორონავირუსის ინფექციის გავრცელების შესამცირებლად დაწესებული შეზღუდვები "საკმაოდ ეფექტური" აღმოჩნდა. ის ამბობს, რომ დაავადება თანდათან უკან იხევს.

"დაავადება ნამდვილად უკან იხევს, გატარებული ღონისძიებები აღმოჩნდა საკმაოდ ეფექტური, რისი მოლოდინიც, რა თქმა უნდა, როგორც ეპიდემიოლოგებს, ასევე ჯანდაცვის სამინისტროს ყველა წარმომადგენლებს გვქონდა. სწორედ ამ მოლოდინებიდან გამომდინარე იქნა წარდგენილი ეს რეკომენდაციები საბჭოზე, რასაც საბჭო, საბოლოო ჯამში, დაეთანხმა", — განაცხადა ეკატერინე ტიკარაძემ.

მისი თქმით, მსჯელობენ დაწესებული რეგულაციების კონტროლის გამკაცრებაზე, თუმცა არა ახალი შეზღუდვების შემოღებაზე. მეტიც, ტიკარაძემ განაცხადა, რომ დიდი ალბათობით, საზოგადოებრივ ტრანსპორტზე დაწესებული შეზღუდვა აღარ გახანგრძლივდება. დღეს, ტიკარაძის მოადგილემ, თამარ გაბუნიამაც განაცხადა, რომ "იმედისმომცემი ეპიდემიოლოგიური სიტუაცია" გვაძლევს საშუალებას, საზოგადოებრივი ტრანსპორტის აღდგენაზე ვისაუბროთ.

საკოორდინაციო საბჭოს გადაწყვეტილებით, საზოგადოებრივი ტრანსპორტის მოძრაობა, თავდაპირველად, 14-დან 4 სექტემბრამდე შეიზღუდა, შემდეგ კი აღნიშნული რეგულაცია 13 სექტემბრამდე გახანგრძლივდა.