პოლიტიკური გაერთიანების, ლელო საქართველოსთვის, ლიდერმა, მამუკა ხაზარაძემ, აღნიშნა, რომ "პროკურატურა ჩიხშია შესული" და ის "ერთ ადამიანს" ემსახურება.

ხაზარაძე-ჯაფარიძე-წერეთლის საქმეზე სასამართლო პროცესი დღეს განახლდა. მამუკა ხაზარაძის თქმით, სასამართლო პროცესების ჩანიშვნა ემსახურება წინასაარჩევნო კამპანიისთვის ხელის შეშლას.

"ისინი პროცესებს მიზანმიმართულად ამთხვევენ ამ პერიოდს, მაგრამ მათი მცდელობა ფუჭია და მიზანს ვერ მიაღწევენ.

"უკვე 2 წელია, რაც ჩვენ ვართ მონაწილე პოლიტიზირებულ და პოლიტიკურად მოტივირებულ საქმეში, რომლის აბსურდულობა დაამტკიცა პრაქტიკულად ყველა საერთაშორისო ექსპერტმა და ორგანიზაციამ. თქვენ იცით, რომ ჩვენი ყველა წინასაარჩევნო კამპანიის დროს იგეგმება სასამართლო მოსმენები. პროკურატურა საკმაოდ დიდი ხანია, არის სერიოზულ ჩიხში შესული, არა მარტო ამ საქმეში, არამედ ზოგადად, იმიტომ, რომ ისინი არ ემსახურებიან კანონს, ისინი ემსახურებიან ერთ ადამიანს და მის ბოტ პრემიერს. სასამართლო მოსმენების ინტენსიურად ჩანიშვნა ემსახურება წინასაარჩევნო კამპანიაში ხელის შეშლას, მაგრამ არ გამოუვათ", — დასძენს ლელოს ლიდერი.