ნაციონალური მოძრაობის წევრის, ლევან ბეჟაშვილის განცხადებით, მათ პარტიულ სიაში მყოფი პირების მიმართ ზეწოლა ხორციელდება. ამის შესახებ მან სპეციალურ ბრიფინგზე ისაუბრა და აღნიშნა, რომ სპეცსამსახურებმა რამდენიმე ადამიანს თანამდებობის დატოვება მოსთხოვეს.

"მნიშვნელოვანი დარღვევა ეს არის ახალქალაქსა და ნინოწმინდაში, სადაც გამოცხადებულია დევნა ჩვენს პარტიულ სიაში მყოფი პირების მიმართ. ახალქალაქში, დაახლოებით, 4 ადამიანთან მიმართებაში, სპეცსამსახურებმა დააწერინეს განცხადება და ისინი თავდაპირველად უარს ამბობდნენ ენმ-ის პარტიულ სიაში ყოფნაზე სხვადასხვა მოტივით. ერთს მაგალითად, მეუღლე ჰყავს ენერგოკომპანიაში დასაქმებული, მეორეს რძალი ჰყავს საბავშვო ბაღში დასაქმებული. მათზე განახორციელეს ზეწოლა და მოსთხოვეს თანამდებობის დატოვება", — თქვა ბეჟაშვილმა.

On.ge სახელმწიფო უსაფრთხოების სამსახურს დაუკავშირდა, სადაც გვითხრეს, რომ აღნიშნულთან დაკავშირებით კომენტარს არ აკეთებენ.

წინასაარჩევნოდ ზეწოლასა და დაშინებაზე სხვა ოპოზიციურმა პარტიებმაც რამდენჯერმე ისაუბრეს. მაგალითად, 3 სექტემბერს გირჩი — მეტი თავისუფლების ლიდერმა, ზურაბ ჯაფარიძემ განაცხადა, რომ სახელმწიფო უსაფრთხოების სამსახური ხალხს, ვინც სხვადასხვა ოლქის სიებში ჰყავთ, "პრობლემების შექმნით" ემუქრება. ამაზე არაერთხელ უსაუბრიათ ყოფილი პრემიერმინისტრის, გიორგი გახარიას გუნდის წევრებსაც.

23 აგვისტოს პარტია საქართველოსთვის ბათუმის მერობის კანდიდატმა, ირაკლი მიქელაძემ განაცხადა, რომ მმართველი გუნდის წევრები ფულს სთავაზობდნენ პარტია საქართველოსთვის კანდიდატებს, რათა წარდგენის შემდეგ პარტია დაეტოვებინათ. ზეწოლასა და მუქარაზე ისაუბრა გახარიას გუნდის რამდენიმე სხვა წევრმაც. 25 აგვისტოს სალომე ღონღაძემ განაცხადა, რომ მას შემდეგ, რაც ქართული ოცნებიდან წასვლისა და გახარიას პარტიაში გადასვლის გადაწყვეტილება მიიღო, შეუთვალეს, რომ შეეწყვიტა გუნდის ფორმირება, წინააღმდეგ შემთხვევაში კი დაემუქრნენ, რომ არა თუ მუნიციპალიტეტის, არამედ ქვეყნის დატოვებაც მოუწევდა.

პირველ სექტემბერს სახალხო დამცველმა განცხადება გაავრცელა, სადაც საუბარი იყოს იმაზე, რომ ყოფილი პრემიერმინისტრის, გიორგი გახარიას პარტიის წევრებთან კავშირის გამო 62 ადამიანის მიმართ სხვადასხვა სახის ზეწოლა განხორციელდა. ომბუდსმენის ცნობით, დასაქმებულები გაათავისუფლეს შინაგან საქმეთა სამინისტროდან, მუნიციპალური სამსახურებიდან, სხვადასხვა მუნიციპალიტეტების მიერ დაფუძნებული სსიპ-ებიდან, ააიპ-ებიდან და სხვა საჯარო დაწესებულებებიდან.