აშშ-ის ევაკუაციის ბოლო თვითმფრინავებმა ავღანეთი უკვე დატოვეს. ეს ინფორმაცია აშშ-ის ოფიციალურმა წარმომადგენლებმა დაადასტურეს. ქაბულის აეროპორტზე სრულ კონტროლს უკვე თალიბანი ახორციელებს.

31 აგვისტო იყო ავღანეთიდან აშშ-ის სამხედროების გასვლის ვადა, რომელიც ჯერ კიდევ რამდენიმე თვის წინ განისაზღვრა. მას შედეგ კი, რაც თალიბანმა ავღანეთზე კონტროლი აიღო, აცხადებდა, რომ 31 აგვისტო იყო წითელი ხაზი და, თუ ამ დროისთვის დასავლეთის ჯარებს ქვეყანა დატოვებული არ ექნებოდათ, ისინი სამაგიეროს გადახდას დაიწყებდნენ.

საზღვაო ძალების გენერალმა ფრენკ მაკენზიმ თქვა, რომ აშშ-ის და კოალიციის სამხედრო თვითმფრინავებმა 123 000-ზე მეტი მშვიდობიანი მოქალაქის ევაკუაცია შეძლეს. მისივე თქმით, ბოლო თვითმფრინავები ქაბულიდან შუაღამემდე ერთი წუთით ადრე აფრინდნენ.

თალიბებმა განაცხადეს, რომ აეროპორტზე კოტროლი მათ აიღეს. ქაბულში ისმოდა სროლის ხმაც.

2021 წლის 14 აპრილს აშშ-ის პრეზიდენტმა ავღანეთიდან ამერიკული ჯარების გაყვანის შესახებ განაცხადა, რომ გაყვანა 1-ელ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს. მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ. ბოლო დღეებში ავღანეთში გარდაცვლილთა რაოდენობის შესახებ ზუსტი მონაცემები არ არსებობს და მედიაში სხვადასხვა მონაცემი ვრცელდება. ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს. ცოტა ხნის წინ ცნობილი გახდა, რომ თალიბანის ხელმძღვანელობამ ასობით მებრძოლი პანჯშირის ხეობის ასაღებად გაგზავნა. თუმცა, შედეგების შესახებ ჯერეჯრობით არაფერია ცნობილი. საერთაშორისო საზოგადოებამ კი თალიბანისთვის ეკონომიკური სანქციების დაწესება დაიწყო. 26 აგვისტოს ქაბულის აეროპორტთან ორი აფეთქება მოხდა. ტერაქტზე პასუხისმგებლობა ISIS-ის ავღანურმა დანაყოფმა აიღო. ტერაქტს 170-ზე მეტი ადამიანის სიცოცხლე ემსხვერპლა, მათ შორის 13 ამერიკელი სამხედრო და თალიბანის 28 მებრძოლი იყო. აშშ და კოალიციის წევრი ქვეყნები აცხადებდნენ, რომ ისინი ევაკუაციას 31 აგვისტომდე არ შეწყვეტდნენ.