ამერიკელი ქალი კოვიდვაქცინით აიცრა და $2 მილიონიც მოიგო

მილიონერობაზე ვინ არ ოცნებობს?! ალბათ ყველას არაერთხელ წარმოგვიდგენია, როგორ ვიგებთ ჯეკპოტს და ვიწყებთ ოცნებების ასრულებას. თუმცა, იმ ვითარებაში, რომელშიც ვიმყოფებით, ბევრის ოცნება კორონავირუსის საწინააღმდეგო ვაქცინის დროული მიღებაა.

აი, ამერიკელი ქრისტინ დუვალი კი ბედმა ვაქცინის მიღებასთან ერთად, ან, შეიძლება ითქვას, აცრის შედეგად, მილიონერობით გაანებივრა.

მიჩიგანის შტატში მცხოვრებმა დუვალმა, კოვიდვაქცინის მიღების შემდეგ, მონაწილეობა ადგილობრივი მთავრობის მიერ გამოცხადებულ ერთგვარ ლატარიაში მიიღო. პროექტი, რომელიც ივლისის თვეში მიმდინარეობდა, ვაქცინაციის წასახალისებლად აცრილებისთვის ფულადი ჯილდოს გაცემას ისახავდა მიზნად.

შედეგად, ამერიკელ ქალს აცრის დასადასტურებლად არა მხოლოდ ბარათი, არამედ $2 მილიონიც აქვს.

დუვალის თქმით, ფულს ის და თავისი ოჯახი შვილების განათლებასა და სახლის განახლებას მოახმარენ. ამასთან, იგი თანხის გაღებას ადგილობრივ თემში მენტალური ჯანმრთელობის სერვისების უზრუნველსაყოფადაც აპირებს.

"ფული ჩვენი ყველა ოცნების მიღწევაში დაგვეხმარება", — ამბობს იგი.

კამპანიამ კი, როგორც ჩანს, გაამართლა. მიჩიგანის გუბერნატორის განცხადებით, შტატში მცხოვრები 16+ მოსახლეობის 65 პროცენტი ერთი დოზით მაინცაა აცრილი.

"ეს პროგრესია. ასე არაერთ სიცოცხლეს გადავარჩენთ. ეს ნიშნავს, რომ ადამიანები შინ დარჩენას შეძლებენ და მათი ჰოსპიტალიზება არ იქნება საჭირო", — დასძენს გუბერნატორი.

აღსანიშნავია, რომ ვაქცინირებული მოქალაქეებისთვის წამახალისებელი ლატარია საქართველოშიც ჩატარდება. დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის, ამირან გამყრელიძის განცხადებით, პირველ სექტემბერს გახდება ცნობილი, როგორ გათამაშდება ფულადი ჯილდოები ერთხელ ან ორჯერ აცრილს მოქალაქეებს შორის.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია 16 წლის ასაკზე უფროს ყველა მსურველს. ვაქცინაციისთვის რეგისტრაციის გავლა შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაციის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.