ეკონომიკის მინისტრის, ნათია თურნავას თქმით, ასეთი თავისუფალი მედია წინა ხელისუფლების დროს არ ყოფილა.

ჟურნალისტის კითხვას, რომელიც უკავშირდებოდა თავკვეთულას მონასტრის ბერის მიერ ფორმულას გადამღებ ჯგუფზე სიტყვიერი შეურაცხყოფის მიყენებას, თურნავამ უპასუხა, რომ ამ შემთხვევას არ იცნობს, თუმცა მედია თავისუფალი და დაცულია.

"მე კონკრეტულ შემთხვევაზე ვერაფერს გეტყვით იმიტომ, რომ არ ვიცნობ, სამწუხაროდ, ამ შემთხვევას, თუმცა ზოგადად, ჩვენი პოზიცია არის, რომ რა თქმა უნდა, სიძულვილის ენა მიუღებელია, ვისგანაც არ უნდა მოდიოდეს ეს და მედია თავისუფალია, დაცულია და მიუღებელია მედიის მიმართ რაიმე აგრესიის გამოხატულება. მედია მაქსიმალურად დაცულია, ასეთი თავისუფალი მედია არ ყოფილა წინა ხელისუფლების დროს", — განაცხადა ეკონომიკის მინისტრმა.

28 აგვისტოს, ტელეკომპანია ფორმულამ გაავრცელა კადრები, სადაც ჩანს, რომ სასულიერო პირმა ჟურნალისტს სიტყვიერი შეურაცხყოფა მიაყენა, დამამცირებელი და ჰომფობიური ტერმინებით მოიხსენია და აგინა. თავკვეთულას მონასტერში ჟურნალისტები იმის გასარკვევად ჩავიდნენ, მიმდინარეობს თუ არა მონასტერში უკანონო მშენებლობა, რამაც ბერის აგრესია გამოიწვია.

ჟურნალისტის რეპლიკას, რომ ჩაწერის უფლება აქვთ, სასულიერო პირი შეურაცხმყოფელი ფრაზებით პასუხობს:

"რაის უფლება გაქვთ, არაფრის უფლება არა გაქვთ. რა უფლება გაქვს? საიდან მოიგონე, რომ უფლება გაქვს. ჟურნალისტი კი არა, პირშისტი ხარ რა, გიყურებ. პირში არ აგიღია, ტო? წადი შენი, დედას დავეცი ახლა რა".

აღსანიშნავია, რომ 22 აგვისტოს დეკანოზმა ილია ჭიღლაძემ გაავრცელა ვიდეო, სადაც ჩანს, რომ ბერი იოანე კაცს შეურაცხყოფას აყენებს ჯგუფური გაუპატიურებით ემუქრება. 26 აგვისტოს კი სამხრეთის კარიბჭემ გაავრცელა აუდიოჩანაწერი, რომელშიც ბერი ამბობს, რომ "ძველი განგსტერია" და დაჭერის არ ეშინია. მისი თქმით, მონასტერში მიმდინარე მშენებლობაზე სააგენტოდან არაერთხელ გააფრთხილეს, მაგრამ საჭიროდ არ მიიჩნევს, რომ მათ რამე შეუთანხმოს.

ეს პირველი შემთხვევა არ არის, როდესაც სასულიერო პირები ჟურნალისტებისადმი აგრესიას ავლენენ და მათ შეურაცხყოფას აყენებენ. იმავეს აკეთებენ მაღალი იერარქიის სასულიერო პირებიც და ხშირად ახალისებენ ჟურნალისტებზე ფიზიკურ და სიტყვიერ თავდასხმებს.

სწორედ ეკლესიის და საპატრიარქო იყო თანაორგანიზატორი 5 ივლისის აქციისა, სადაც პრორუსულმა და ძალადობრივმა ჯგუფებმა ჟურნალისტებზე იძალადეს. შედეგად მედიის 53 წარმომადგენელი დაშავდა. რამდენიმე დღეში აქციაზე ნაცემი TV პირველი ოპერატორი, ლექსო ლაშქარავა გარდაიცვალა.