დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის, ამირან გამყრელიძე ექიმებს მოუწოდებს, ნუ ეწევიან ვაქცინაციის საწინააღმდეგო აგვიტაციას. ის ამბობს, რომ ძალიან სწყინს, რომ მის კოლეგებს შორის ანტივაქსებიც არიან.

"მე ძალიან მწყინს, რომ ჩემს კოლეგებში ანტივაქსერები არიან. არადა, არიან. უნდა ვაღიარო. სამწუხაროდ, ზოგიერთი ძალიან აქტიურობს სოციალურ ქსელებში. კიდევ ერთხელ მინდა მათ მივმართო და მოვუწოდო: რა თქმა უნდა, თითოეული ადამიანი თავის შეხედულებებში თავისუფალია და გამოხატვის თავისუფლება ერთ-ერთი ფუნდამენტური უფლებაა უფლებათა შორის, მაგრამ, როცა არის ქვეყანაში პანდემია და ეპიდემია; როცა ვიცით, რომ ეს ვირუსი ნამდვილად კლავს ადამიანებს — სამწუხაროდ, 1 000 ინფიცირებულიდან, ვიცით, რომ 10-15, ხანდახან 20-ც შეიძლება რომ დაიღუპოს; ვიცით, რომ ამ დაღუპვის ერთ-ერთი საუკეთესო საშუალება არის პრევენციული აცრა. ამ დროს, როგორ შეიძლება, რომ ადამიანებს მოვუწოდოთ, რომ არ ავიცრათ

არ არის, მე ვიცი, ძალიან ბევრი, ექიმებში ანტივაქსერები, მაგრამ, ვინც არიან იმათ მივმართავ და ვთხოვ უმორჩილესად — ქე მაინც, საწინააღმდეგო აგიტაციას ნუ ეწევით. ის ანტივაქსერობა თქვენთვის შეინახეთ. იმიტომ, რომ დღეს პირიქით, ყველა სამედიცინო მუშაკმა კი არა, ყველა ადამიანმა უნდა მოუწოდოს თავისი ოჯახის წევრებს, თავის ახლობლებს, რომ წადით და აიცერით, წადით და აიცერით. ამაზე გადის ქვეყნის გადარჩენის, ქვეყნის ეკონომიკური განვითარების გზა", — განაცხადა ამირან გამყრელიძემ.

მისივე ინფორმაციით, ვაქცინირებული ადამიანებისთვის მალე წამახალისებელი ლატარიის გათამაშება დაიწყება.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.

გაიგეთ მეტი: როგორ უნდა მიხვიდეთ ასაცრელად, როცა საზოგადოებრივი ტრანსპორტი შეზღუდულია — მარშრუტები