საქართველოს ახალგაზრდა იურისტთა ასოციაციის განცხადებით, ორი სოციალური მუშაკი, რომლებიც სოციალური მომსახურების სააგენტოდან გასული წლის იანვარში გაათავისუფლეს, სამსახურში აღადგინეს და განაცდური აუნაზღაურეს. მათ უფლებებს სასამართლოში საია იცავდა.

"სასამართლოებმა მათი მოთხოვნები სრულად დააკმაყოფილეს - ბათილად ცნეს სამსახურიდან გათავისუფლების ბრძანებები. მოპასუხეს ასევე დაევალა სოციალური მუშაკების სამსახურში აღდგენა და გათავისუფლებიდან სასამართლოს გადაწყვეტილების აღსრულებამდე პერიოდის განმავლობაში იძულებითი განაცდურის ანაზღაურება. პირველი ინსტანციის სასამართლოების გადაწყვეტილებები მოპასუხემ ზემდგომ ინსტანციებში აღარ გაასაჩივრა, სოციალური მუშაკები აღადგინა სამსახურში და აუნაზღაურა განაცდური", — ამბობენ ორგანიზაციაში.

მათივე ცნობით, აღნიშნული პირები სამსახურიდან რეორგანიზაციის შედეგად გაათავისუფლეს, ცვლილებების თანახმად, ზრუნვის სააგენტოს, საჭიროების შემთხვევაში, სოციალური და მომსახურების სააგენტოში შტატით დასაქმებულ თანამშრომელთა და შტატგარეშე მომუშავეთა უკონკურსოდ გადაყვანა უნდა უზრუნველყო შესაბამის თანამდებობაზე, თუმცა ამის მიუხედავად, არაერთი სოციალური მუშაკი სამსახურიდან რეორგანიზაციის საბაბით დაუსაბუთებლად გაათავისუფლეს.