სტრატეგია აღმაშენებლის თავმჯდომარე, დეპუტატი გიორგი ვაშაძე ფიქრობს, რომ აუცილებელია გამკაცრდეს რეგულაციები მინიმუმ ორი კვირის მანძილზე, რათა გაწყდეს კორონავირუსის გადაცემის ჯაჭვი. ის, ასევე, ფიქრობს, რომ ყველა მოქალაქისთვის უფასო უნდა იყოს კორონავირუსზე ტესტირება.

"სამწუხაროდ, გვაქვს ქაოსი და ასეთ მძიმე ვითარებას სჭირდება სისტემური და კომპლექსური მართვა [...] ჩვენ ვფიქრობთ, რომ მინიმუმ ორი კვირის მანძილზე უნდა გამკაცრდეს რეგულაციები, რომ გადაცემის ჯაჭვი შეწყდეს ქვეყანაში. ამასთან ერთად, ძალიან მნიშვნელოვანია, რომ გაფართოვდეს ვაქცინაციის შესაძლებლობა და ხელმისაწვდომობა და გაფართოვდეს ტესტირების შესაძლებლობა და უფასო ტესტირება უნდა იყოს შესაძლებელი აბსოლუტურად ყველა მოქალაქისთვის", — განაცხადა გიორგი ვაშაძემ.

რეგულაციების გამკაცრებისკენ მოუწოდა დღეს მთავრობას კლინიკების ასოციაციამაც. მათი თქმით, ასევე, მნიშვნელოვანია, ვაქცინაციის პროცესში 12-16 წლის მოზარდების ჩართვაც.

გაიგე მეტი: