ქაბულის აეროპორტიდან აფრენილი თვითმფრინავიდან გადმოვარდნილი და გარდაცვლილი ერთ-ერთი პირი ახალგაზრდა ავღანელი ფეხბურთელი ზაკი ანვარია. ამ ინფორმაციას ავღანეთის ფიზიკური აღზრდისა და სპორტის გენერალური დირექტორატი ფეისბუქზე ავრცელებს.

"დიდი სინანულითა და მწუხარებით გატყობინებთ, რომ მიღებული ინფორმაციით, ზაკი ანვარი, ეროვნული ნაკრების ერთ-ერთი ახალგაზრდა ფეხბურთელი, საშინელი უბედური შემთხვევის დროს გარდაიცვალა... ის იმ ასობით ახალგაზრდას შორის იყო, რომლებიც ქვეყნის დატოვებას ცდილობდნენ. ზაკი ამერიკის სამხედრო თვითმფრინავიდან ჩამოვარდა, რასაც ემსხვერპლა მისი სიცოცხლე", — ნათქვამია განცხადებაში.

კვირას, მას შემდეგ რაც ქაბულზე კონტროლი თალიბანმა აიღო, ჰამიდ კარზაის საერთაშორისო აეროპორტს ათასობით ადამიანი მიაწყდა, რათა ქვეყნის დატოვების გზა ეპოვათ. მათი ნაწილი, რომელმაც აშშ-ს თვითმფრინავში მოხვედრა ვერ შეძლო, მას გარედან ჩაეჭიდნენ. გავრცელდა ვიდეოები, სადაც ჩანს, რომ თვითმფრინავის აფრენის შემდეგ რამდენიმე ადამიანი ჩამოვარდა და გარდაიცვალა.