უკვე ოფიციალურად დადასტურდა, რომ ენტონი მაკი მარველისთვის სუპერგმირის ფორმაში გამოეწყობა, რათა კაპიტანი ამერიკის შესახებ გადაღებული ფილმების სერიის მეოთხე ნაწილში ითამაშოს.

ენტონი მაკი მარველის კინოსამყაროში პირველად 2014 წელს გამოჩნდა ფილმში კაპიტანი ამერიკა: ზამთრის ჯარისკაცი სემ უილსონის როლში. შემდეგ იმავე როლით კიდევ ვიხილეთ მარველის სხვა არაერთ ფილმში, საბოლოოდ კი Avengers: Endgame-ში (შურისმაძიებლები: დასასრული) კრის ევანსის პერსონაჟმა, სტივ როჯერსმა სწორედ მას გადააბარა კაპიტანი ამერიკის ფარი.

2021 წელს ასევე გამოვიდა სერიალი The Falcon and The Winter Soldier (ფალკონი და ზამთრის ჯარისკაცი), რომელშიც ერთგულმა ფანებმა ენტონი მაკის პერსონაჟი უკეთ გაიცნეს.

ჯერჯერობით კაპიტანი ამერიკა 4-ის შესახებ სხვა დეტალები უცნობია: არ ვიცით, ვინ გადაიღებს ფილმს, ვინ ითამაშებს მაკისთან ერთად ან რა იქნება სიუჟეტის მთავარი ხაზი. აქამდე ამ სუპერგმირის შესახებ სამი დამოუკიდებელი ფილმია გამოსული — 2011-ში პირველი შურისმაძიებელი, 2014-ში ზამთრის ჯარისკაცი და 2016-ში სამოქალაქო ომი.

მომავალი ფილმი, სავარაუდოდ, 2023 წელს გამოვა და სამწუხაროდ, ჯერ არც ის ვიცით, ვიხილავთ თუ არა სემ უილსონის გვერდით ზამთრის ჯარისკაცს, სებასტიან სტანს.

ფოტო: Disney+