განათლების მინისტრმა და ვიცე-პრემიერმა, ალექსანდე ჯეჯელავამ რუსთავი 2-ის საქმეზე და სტრასბურგის გადაწყვეტილებაზე გაზეთ კვირის პალიტრასთან ისაუბრა:

"რამდენადაც მტკივნეული არ უნდა იყოს, უზენაესი სასამართლოს გადაწყვეტილება ძალაში შევა, თუმცა არც კი განიხილება სტრასბურგის სასამართლოს საბოლოო გადაწყვეტილებამდე ხელისუფლებამ მის აღსრულებაზე იფიქროს", - ამბობს ჯეჯელავა ინტერვიუში და აცხადებს იმასაც, რომ რუსთავი 2 თავისუფალი მედია სულაც არ არის და "ყველაზე კონტროლს დამორჩილებული ტელევიზიაა":

"ვიცით, რომ სააკაშვილი ყოველდღიურად პირადად განიხილავს და დეტალურად ერკვევა გადაცემების შინაარსში რუსთავი 2-ის რამდენიმე თანამშრომელთან ერთად".

ალექსანდრე ჯეჯელავა ფიქრობს, რომ სტრასბურგის მეორე გადაწყვეტილებაზე, პირველმა შეჩერების მექანიზმმა მოახდინა გავლენა, რადგან მისივე თქმით, "ნებისმიერი თავმოყვარე ინსტიტუცია" დაფიქრდება ორ განსხვავებულ გადაწყვეტილებაზე:

"უნდა გავითვალისწინოთ, რომ სტრასბურგის შვიდი მოსამართლის განსხვავებული გადაწყვეტილება, იმ ერთ მოსამართლეზე მნიშვნელოვანი დარტყმა იქნებოდა, ანუ გამოვიდოდა რომ სტრასბურგი როგორც უმნიშვნელოვანესი ინსტიტუცია, დაუბალანსებელ გადაწყვეტილებებს იღებს".

ალექსანდრე ჯეჯელავას თქმით, სტრასბურგმა უზენაესი სასამართლოს გადაწყვეტილება იმიტიმ შეაჩერა, რომ რუსთავი 2-ის ადვოკატებმა მას "აპოკალიფსი დაუხატეს":

"როდესაც სტრასბურგმა რუსთავი 2-ის სარჩელის საფუძველზე აღსრულების შეჩერება მოითხოვა, ხელისუფლებისთვის, როგორც მეორე მხარისთვის არაფერი უკითხავთ. ეს გასაგებიცაა - გადაწყვეტილება მოსამართლემ დაჩქარებულად მიიღო, რადგან კომპანიამ აპოკალიფსი დაუხატა, თითქოს რუსთავი 2 უკანასკნელი თავისუფალი მედიასაშუალებაა და თუ გადაწყვეტილება აღსრულდება, თბილისის ქუჩებში ტრაგედიას უნდა ველოდოთო. მესმის, რომ სტრასბურგის მოსამართლე ამ პასუხისმგებლობის საკუთარ თავზე აღებას მოერიდა".

სტრასბურგის ადამიანის უფლებათა ევროპულმა სასამართლომ, უზენაესი სასამართლოს გადაწყვეტილების აღსრულება, რუსთავი 2-ის საქმეზე, უვადოდ შეაჩერა.

ევროპის პარლამენტი მოუწოდებს საქართველოს ხელისუფლებას, ნუ გამოიყენებს სასამართლო სისტემას პოლიტიკურად მომგებიანი შედეგის მისაღებად.