გირჩის ლიდერის, იაგო ხვიჩიას განცხადებით, როცა ოპოზიცია ამ არჩევნებშიც იმავე "ტაქტიკით თამაშობს", შეიძლება, ეჭვი გაჩნდეს, რომ სინამდვილეში მე-2 ადგილისთვის იბრძვიან და არა გამარჯვებისთვის. ამის შესახებ მან TV პირველის ეთერში ისაუბრა.

"ლევან იოსელიანმა მითხრა, 15 არჩევნები აქვს წაგებული ოპოზიციას რაც ბიძინა მოვიდა, მას შემდეგო. 15-ვეში, თუ დავაკვირდებით, მართლა გამოყენებულია ერთი და იგივე ტაქტიკა სულ. ოპოზიცია სულ ამას აგებს და 15-ს რომ წააგებ და ისევ იმავე ტაქტიკით თამაშობ, ხომ შეიძლება, მე ეჭვი გამიჩნდეს, რომ შენ წაგება გინდა, სინამდვილეში მე-2 ადგილისთვის ჩალიჩობ და არა სიტყვაზე, გამარჯვებისთვის? ამ კამპანიაში, მე მგონი, ყველა ხედავს, მოსახლეობა ხედავს, ქოცებიც კი გაკვირვებულები არიან, რას შვრება ოპოზიცია? სად არის? რას ლაპარაკობს?", — თქვა მან.

მისივე თქმით, ამ წუთის მოცემულობით, ოპოზიციის კამპანია არ ჩანს და იმასაც არ გამორიცხავს, რომ ოპოზიციის ნაწილის მერობის საერთო კანდიდატი, ნიკა მელია "შეგნებულად შეჰყავდეთ წაგებულ ბრძოლაში".

"მაგალითად, ნაციონალური მოძრაობა, დროა, ჩვენი ძველი მეგობრები და ევროპული საქართველო, ერთად რომ რაღაცას შვრებიან, ამას რა ჰქვია? რისთვის იბრძვის ეს ხალხი? დანარჩენი ოპოზიცია სად არის? ამათი აზრით, დანარჩენი ოპოზიცია ოპოზიცია არ არის ფიზიკურად? მე ზოგადად, ასევე არ გამოვრიცხავ იმასაც, რომ მთელი ეს კამპანია ხდებოდეს იმისთვის, რომ ნიკა მელია დააზიანონ თავისი პარტიის შიგნით და შეგნებულად შეჰყავდეთ წაგებულ ბრძოლაში. მე ამასაც არ გამოვრიცხავ, იმიტომ, რომ იმდენად გაუგებარია მთელი ეს პროცესი, მართლა მოგება თუ გინდა და თან ახლა, კახა კალაძეს თუ გინდა მოუგო, ასეთი კამპანია ხომ არ შეიძლება?", — ამბობს ხვიჩია.

თვითმმართველობის არჩევნები 2 ოქტომბერს იქნება. კანდიდატები რამდენიმე პარტიამ უკვე დაასახელა. ქართული ოცნებიდან თბილისის მერობისთვის კახა კალაძე იბრძოლებს, ოპოზიციის ნაწილის კანდიდატი ნაციონლური მოძრაობის ლიდერი, ნიკა მელია, ხოლო ლეიბორისტული პარტიის თბილისის მერობის კანდიდატი მიხეილ ქუმსიშვილია.

როგორც უკვე ცნობილია, ოპოზიციის გარკვეული ნაწილი, მაგალითად ალეკო ელისაშვილი და გიორგი ვაშაძე მელიას მხარს არ დაუჭერენ. ასევე, ცნობილია, რომ საკუთარი კანდიდატი ეყოლება გიორგი გახარიას პარტიას, როგორც თბილისში, ისე რეგიონებში.