დაავადებათა კონტროლის ეროვნული ცენტრის ხელმძღვანელის მოადგილე მოსახლეობას მოუწოდებს, ექიმს, რომელმაც აცრის რეკომენდაცია არ მისცა, ჩანაწერი გააკეთებინოს, რა მიზეზით ეუბნება უარს. ამის შესახებ პაატა იმნაძემ მედიისთვის გამართულ ვებინარზე ისაუბრა.

ის ამ მიმართვით ეხმაურება შემთხვევებს, როდესაც ადამიანები ექიმების რჩევით არ იკეთებენ აცრას. ექიმები კი არაცრის რეკომენდაციას ძირითადად ალერგიის და რიგ შემთხვევებში, ქრონიკული დაავადებების გამო აძლევენ. როგორც იმნაძემ განაცხადა, არაკომპეტენტურობას გამოავლენენ ის ექიმები, ვინც ჩაწერენ, რომ მოქალაქეს აცრაზე უარს ბავშვობაში გადატანილი ჭინჭრის ციების გამო ეუბნებიან.

„ჩემთვის ნამდვილად ძალიან მძიმე კითხვაა. იცით, დიდი ხანია, აღარ ვარ კლინიცისტი მე ამას ვუდგები საზოგადოებრივი ჯანდაცვის მხრიდან, თუ ვაქცინას არ უწერია კონკრეტული უკუჩვენება ინსტრუქციაში, ყველა დანარჩენი ადამიანისთვის, ეს ვაქცინა აბსოლუტურად მისაღებია. არ არსებობს უკუჩვენება, რასაც ჰქვია ალერგია. ამ კითხვას, ალბათ, ჩემზე უკეთ ბიძინა კულუმბეგოვმა უპასუხებდა. როგორც იცით, მან თავის დროზე თითქმის ყველა ექიმს ჩაუტარა ტრენინგი და კიდევ რაღაც მითიურ ალერგიებს იშველიებენ.

მინდა, მოსახლეობას მივამართო, ექიმმა ჩაუწეროს პირდაპირ, რატომ ეუბნება უარს აცრაზე, რა მიზეზით. მოითხოვეთ, რომ ექიმმა ეს ჩანაწერი გააკეთოს. დამერწმუნეთ, რომ შემდეგ ამას აღარ იტყვიან. ამით თავის არაკომპეტენტურობას გამოავლენენ ისინი, ვინც ჩაწერენ, რომ ბავშვობაში ჰქონდა ჭინჭრის ციება, ამიტომ ეუბნებიან უარს აცრაზე", — აღნიშნავს იმნაძე.

მისი თქმით, ამის შემდეგ შესაძლებელი იქნება, რომ პროფესიულ დონეზე მოხდეს ექიმის გადაწყვეტილებების შეფასება.