პარიზის კლუბ პარი სენ-ჟერმენის ინსტაგრამის გამომწერების რაოდენობა ბოლო კვირაში ელვის სისწრაფით გაიზარდა. მიზეზი რა თქმა უნდა ლიონელ მესის ფაქტორია — როცა არგენტინელმა ფეხბურთელმა ბარსელონა დატოვა, ის საფეხბურთო წრეებში მალევე დააკავშირეს PSG-სთან.

იმ კვირაში, როცა მესი ბარსელონადან წამოვიდა, PSG-ს ინსტაგრამის გამომწერების რაოდენობა 19 მილიონი იყო. ამ სტატიის წერის მომენტში კი პარიზის საფეხბურთო კლუბის გამომწერთა რაოდენობა 43,2 მილიონია.

ოფიციალური ანონსის გავრცელების შემდეგ კი პარი სან-ჟერმენის ინსტაგრამის ანგარიშს მესის გულშემატკივრების არმიის სახით 4 მილიონი გამომწერი შეემატა.

შეთანხმება წარმატებულია ლიონელ მესისთვისაც — იმის მიუხედავად, რომ მის ინსტაგრამზე ჯერ პარი სან-ჟერმენის შესახებ ინფორმაცია არ იძებნება, მისი აუდიტორია 3 მილიონი გამომწერით გაიზარდა. 247-მილიონიანი გამომწერების რაოდენობით მან კიმ კარდაშიანს გადაუსწრო და ინსტაგრამის ისტორიაში მე-7 ყველაზე მეტი გამომწერის მქონე პიროვნება გახდა.

მესი PSG-ში 30-ე ნომრად ითამაშებს. კლუბთან მას 2-წლიანი შეთანხმება აქვს და მისი წლიური შემოსავალი პარიზულ კლუბში $30-$35 მილიონამდე იქნება.

34 წლის ლიონელ მესი მსოფლიოში ერთ-ერთ საუკეთესო ფეხბურთელად ითვლება. ბარსაში თამაშის დროს 778 მატჩის ფარგლებში მან 672 გოლი გაიტანა. მესი ესპანურ კლუბს 13 წლის ასაკში შეუერთდა.