ჯანდაცვის მინისტრის, ეკატერინე ტიკარაძის განცხადებით, კორონავირუსით ინფიცირების მაჩვენებელი პიკს 20 აგვისტოსთვის მიაღწევს. ტიკარაძე ამბობს, რომ მიმდინარე სტატისტიკით თუ ვიმსჯელებთ, ეს გარდაუვალია.

"იცით როგორ არის საქმე?! პიკურ მაჩვენებელს, ჩვენ მოლოდინი გვაქვს, რომ მივაღწევთ სადღაც 20 აგვისტოსთვის, რაც უკვე, დღევანდელი მონაცემებით, არის გარდაუვალი", — განაცხადა ტიკარაძემ რუსთავი 2-ის ეთერში.

ჯანდაცვის მინისტრს დღეს ჟურნალისტებმა ჰკითხეს, რამდენ ხანს შეძლებს ჯანდაცვის სისტემა პაციენტებისთვის შესაბამისი სერვისების მიწოდებას ამ პირობებში. ეკატერინე ტიკარაძემ განაცხადა, რომ თუ ინციფირების ზრდა ამ ტემპით გაგრძელდა, ერთი კვირის შემდეგ ჯანდაცვის სისტემას გაჭირდება პაციენტების მიღება.

"თითოეულ დღეს ინფიცირებულთა 13% ხვდება სტაციონარში, რაც არ არის რთული დასათვლელი. მნიშვნელოვანი არის, რომ ინფექციის მატებასთან ერთად, რა თქმა უნდა, გამოჯანმრთელებულების რიცხვი იზრდება. გარკვეულ პერიოდში და ეს არის, ალბათ, ერთკვირიანი პერიოდი, როდესაც იქნება საკმაოდ რთული უკვე პაციენტების მიღება იმ შემთხვევაში, თუ არ მოხდა ინფექციის გავრცელების სიჩქარის კლება და რა თქმა უნდა, ინფიცირებულთა რაოდენობის შედარებით კლებისკენ წამოყვანა", — განაცხადა ეკატერინე ტიკარაძემ.

ტიკარაძის მოადგილემ, თამარ გაბუნიამ წესების დაცვის აუცილებლობაზე ისაუბრა და განაცხადა, რომ თუ პასუხისმგებლობა ვერ განაწილდა მოქალაქესა და სახელმწიფოს შორის, ამ ტიპის რეგულაციები სრულად ვერასდროს აღსრულდება.

გაიგე მეტი: