ინფექციური საავადმყოფოს სამედიცინო დირექტორის, მარინა ეზუგბაიას თქმით, ბუნებრივია, რომ მაღალ ინფიცირებულთა რიცხვს, სიკვდილიანობის მაღალი მაჩვენებელიც მოჰყვება. ის იმუნიზაციას არსებული მდგომარეობის გაუმჯობესების ერთ-ერთ ფაქტორად ასახელებს და ამბობს, რომ რეგულაციები უნდა შესრულდეს და ამისთვის "აღსრულება არ უნდა გვჭირდებოდეს". ასე გამოეხმაურა ის მთავრობის განცხადებას იმის შესახებ, რომ რეგულაციების შესრულებას მკაცრად გააკონტროლებენ.

"ლეტალობის ასეთი მაღალი მაჩვენებელი პირდაპირ მიბმულია დაავადების მატებასთან, მათ შორის, მძიმე და კრიტიკული პაციენტების რაოდენობის მატებასთან. ამიტომ კიდევ ერთხელ მე როგორც ექიმი, კლინიცისტი და ინფექციონისტი მოვუწოდებ ყველას, აი ამ მაჩვენებლების უკუსვლის, გაუმჯობესების ერთადერთი წყარო გახლავთ რეგულაციების დაცვა და ვაქცინაცია", — თქვა მარინა ეზუგბაიამ

11 აგვისტოს მონაცემებით, საქართველოში კორონავირუსის 5 352 ახალი შემთხვევა დადასტურდა, გამოჯანმრთელდა 2 635, ხოლო გარდაიცვალა — 48 ადამიანი. პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 461 198-ს, ჯამში გამოჯანმრთელებულთა რაოდენობა გაიზარდა 409 110-მდე, ხოლო ვირუსს ჯამში 6 230 პირი ემსხვერპლა.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.