ევროპული საქართველო, გირჩი — მეტი თავისუფლება და დროა თბილისის საკრებულოში მაჟორიტარობის საერთო კანდიდატებს წარადგენენ. სამი პარტიის მიერ წარდგენილ კანდიდატებს მხარს დაუჭერს ნაციონალური მოძრაობაც. ამის შესახებ პარტიის ლიდერებმა ერთობლივ ბრიფინგზე განაცხადეს.

კონკრეტულ კანდიდატებს პარტიები კვირას, 15 აგვისტოს წარადგენენ.

"ჩვენ მივესალმებით ნაციონალური მოძრაობის გადაწყვეტილებას, რომ თბილისში მაჟორიტარები არ დააყენოს და დაუთმოს ეს დანარჩენ ოპოზიციას. შესაბამისად, ევროპული საქართველო, გირჩი და დროა შეთანხმდა, თუ რა ტიპის განაცხადს გავაკეთებთ და ძალიან მალე უკვე კონკრეტულ კანდიდატებს შემოგთავაზებთ", — განაცხადა დროას დამფუძნებელმა, ელენე ხოშტარიამ.

პარტიის, გირჩი — მეტი თავისუფლება ლიდერი, ზურაბ ჯაფარიძე აცხადებს რომ ადგილობრივი თვითმმართველობის მომავალი არჩევნები არის ერთ-ერთი ყველაზე მნიშვნელოვანი არჩევნები, რაც ბოლო პერიოდში ჩატარებულა ქვეყანაში.

"ამ არჩევნებზე წყდება ამ ხელისუფლების ლეგიტიმაციის საკითხი. ეს არ არის ჩვეულებრივი, რიგითი ადგილობრივი არჩევნები", — განაცხადა ზურაბ ჯაფარიძემ.

ევროპული საქართველოს თავმჯდომარის, გიგა ბოკერიას თქმით, მნიშვნელოვანია, რომ ამ არჩევნების შემდეგაც არ მოექცეს ძალაუფლება ერთი კონკრეტული პოლიტიკური სუბიექტის ხელში.

"ოპოზიციის უდიდეს ნაწილს, კრიტიკულ ნაწილს, ესმის კარგად, რომ ამ მავნებლური, საზიანო და სახიფათო ხელისუფლების გამოცვლის შემდეგაც, არცერთი პოლიტიკური ძალის ხელში აღარ უნდა მოხდეს კონცენტრაცია სრული ძალაუფლების", — განაცხადა გიგა ბოკერიამ.

პარტიების ლიდერებმა, ასევე, განაცხადეს, რომ საუბარია სხვა ტიპის შეთანხმებებსა და კოორდინირებულ გეგმებზე, რომელთა შესახებ ინფორმაციასაც თანდათანობით გაასაჯაროებენ.

ადგილობრივი თვითმმართველობის არცევნები 2 ოქტომბერს გაიმართება.