რუსეთის ფედერაციის საგარეო საქმეთა მინისტრის, სერგეი ლავროვის მტკიცებით, დასავლეთის ქვეყნები რუსეთში არჩევნებისთვის ხელის შესაშლელად საერთაშორისო სტრუქტურებს იყენებენ. საერთაშორისო სტრუქტურებში ლავროვი ევროპის უსაფრთხოებისა და თანამშრომლობის ორგანიზაციას (ეუთო) გულისხმობს. რუსეთის საგარეო უწყების ხელმძღვანელის აზრით, დასავლეთის ქვეყნები წინასწარ ემზადებიან იმისთვის, რომ სახელმწიფო დუმის არჩევნების შედეგები ეჭვქვეშ დააყენონ.

"ჩვენს საშინაო საკითხებს საზღვარგარეთ, განსაკუთრებით არჩევნებს, ახლა განსაკუთრებული ყურადღება ექცევა, პირველ რიგში, ჩვენი დასავლელი პარტნიორების მხრიდან. ისინი ცდილობენ, ხმის მიცემის პროცესის გართულების მიზნით საერთაშორისო ორგანიზაციები გამოიყენონ. მათ გამოიყენეს ეუთო მიუღებელი ქმედებებისთვის, რაც ორგანიზაციის სამდივნოსა და ოფისის მოვალეობებს ეწინააღმდეგება", — ირწმუნება ლავროვი.

რუსეთის დუმის არჩევნები 19 სექტემბერსაა დანიშნული. აღსანიშნია, რომ რუსეთს არჩევნებში ჩარევის საქმეში დასავლეთის არაერთი ქვეყანა ადანაშაულებს.