თბილისის მერიის ინფორმაციით, თბილსერვის ჯგუფის გაფიცული თანამშრომლების ნაწილი სამუშაო რეჟიმს უკვე დაუბრუნდა. მერიის ინფორმაციით, თბილსერვის ჯგუფის ხელმძღვანელობა, თბილისის მერიის ადმინისტრაციის წარმომადგენლებთან ერთად, აქციის მონაწილეებს შეხვდა და მათ მოთხოვნებს გაეცნო.

"შეხვედრაზე ხაზი გაესვა, რომ მოთხოვნათა დიდი ნაწილი უკვე შესრულებულია, კერძოდ, უნიფორმების და სპეცტექნიკის განახლების მიმართულებით გადადგმულია ნაბიჯები. ასევე, გასული წლის დეკემბრიდან მოხდა თბილსერვის ჯგუფის თანამშრომელთა ხელფასების 20%-იანი ზრდა. შეხვედრაზე აღინიშნა, რომ ევროპის რეკონსტრუქციისა და განვითარების ბანკის მიერ გამოყოფილია სესხი ახალი სპეცტექნიკის შეძენის მიზნით და რამდენიმე მილიონი ევროს ღირებულების ტენდერი ახლო მომავალში გამოცხადდება", — აცხადებენ მერიაში.

დღეს, 6 აგვისტოს თბილსერვისის ჯგუფის დასუფთავების სამსახურის თანამშრომლები გაიფიცნენ. ისინი ხელფასების მომატებასა და ხელშეკრულების პირობების შესრულებას ითხოვდნენ. თანამშრომლები საუბრობდნენ იმაზეც, რომ მათ რთულ პირობებში უწევთ მუშაობა, მათ შორის, მძიმე მდგომარეობაშია დასუფთავების მანქანები, უნიფორმები და ნაგვის ურნები.