პრეზიდენტის ადმინისტრაციის ინფორმაციით, საკონსტიტუციო სასამართლოს შესახებ კანონზე ვენეციის კომისიის დასკვნა 27 მაისს გახდება ცნობილი.

დღეს, 24 მაისს, პრეზიდენტის მრჩეველი ადამიანის უფლებებისა და მართლმსაჯულების საკითხებში, კახა კოჟორიძე და ეროვნული უშიშროების საბჭოს მდივნის მოადგილე, ლევან ბოძაშვილი სტრასბურგში ვენეციის კომისიის მდივანს და კონსტიტუციური მართლმსაჯულების ერთობლივი საბჭოს ხელმძღვანელს შეხვდნენ.

კოჟორიძის განმარტებით, შეხვედრაზე საქართველოს პარლამენტის მიერ მიღებული საკონსტიტუციო სასამართლოს შესახებ საკანონმდებლო ცვლილებების პაკეტი მუხლობრივად განიხილეს:

"მიგვაჩნია, რომ ეს კანონპროექტი სერიოზულ რისკებს შეიცავს საკონსტიტუციო სასამართლოს გამართულად მუშაობისთვის. გვითხრეს გადაწყვეტილად ის, რომ ვენეციის კომისიის დასკვნა პარასკევს იქნება".

მისი განმარტებით, იმ შემთხვევაში, თუ ვენეციის კომისიის დასკვნა პრეზიდენტის გადაწყვეტილებამდე დაიდება, აღნიშნული გიორგი მარგველაშვილს გადაწყვეტილების მიღებაში დაეხმარება.