მას შემდეგ, რაც გუშინ საკონსტიტუციო სასამართლოს შესახებ კანონში ცვლილებები პრეზიდენტმა პარლამენტისგან მიიღო, დღეს, 20 მაისს, გიორგი მარგველაშვილმა ის, მასში შეტანილი ცვლილებებით, ვენეციის კომისიას დასკვნისთვის გადაუგზავნა. ამის შესახებ ჟურნალისტებს პრეზიდენტის თანაშემწემ უშიშროების საკითხებში, ირინა იმერლიშვილმა განუცხადა.

მისი განმარტებით, სანამ პრეზიდენტი გადაწყვეტილებას მიიღებს, მოაწეროს აღნიშნულ კანონს ხელი თუ დაუბრუნოს ის პარლამენტს მოტივირებული შენიშვნებით, არასამთავრობო სექტორთან კონსულტაციებს კიდევ ერთხელ გაივლის.

ჟურნალისტის შეკითხვას, დაელოდება თუ არა ვენეციის კომისიის დასკვნას პრეზიდენტი იმისთვის, რომ გადაწყვიტოს დაადებს თუ არა ვეტოს აღნიშნულ კანონს, იმერლიშვილმა უპასუხა, რომ პრეზიდენტს ათდღიანი კონსტიტუციური ვადა აქვს, ვენეციის კომისიაში გადაზგავნილ წერილში კი მითითებულია თხოვნა, რომ შეძლებისდაგვარად ოპერატიულად გამოაგზავნონ დასკვნა.