ამერიკის შეერთებული შტატების პრეზიდენტმა ჯო ბაიდენმა განაცხადა, რომ არაერთი ქალის სექსუალურად შევიწროებაში დადანაშაულებული ნიუ-იორკის გუბერნატორი, ენდრიუ კუომო უნდა გადადგეს.

ბაიდენმა პირველად მარტს დააფიქსირა თავისი აზრი, რომ კუომო ბრალის დამტკიცების შემთხვევაში უნდა გადამდგარიყო, სამ აგვისტოს კი ჟურნალისტებს დაუდასტურა, რომ ისევ ასე ფიქრობს.

"სჯობს, ჯერ დავიცადოთ. ვფიქრობ, ის უნდა გადადგეს" — პასუხობს ბაიდენი კითხვაზე, საჭირო იქნება თუ არა კუომოს იმპიჩმენტი, თუ ის თავისი ნებით არ დატოვებს თანამდებობას.

გენერალური პროკურატურის განცხადებით, ნიუ-იორკის გუბერნატორმა, ენდრიუ კუომომ არაერთი ქალი სექსუალურად შეავიწროვა. პროკურატურა ამბობს იმასაც, რომ კუომო ცდილობდა სამაგიერო გადაეხადა ერთ-ერთი ქალისთვის, რომელიც მას შევიწროებაში ადანაშაულებდა.

პროკურორის, ლეტისია ჯეიმსის თქმით, გამოძიებით დადგინდა, რომ კუომო წლების განმავლობაში სექსუალურად ავიწროვებდა ამჟამინდელ და ყოფილ სახელმწიფო თანამშრომლებს, ასევე რამდენიმე ქალს, რომელიც სახელმწიფო სტრუქტურაში არ იყო დასაქმებული და არც მის დაქვემდებარებაში მუშაობდა. პროკურორის თქმით, კუომო არასასურველად, მათი ნების წინააღმდეგ ეხებოდა ქალებს, ეუბნებოდა სექსუალური და შეურაცხმყოფელი შინაარსის ფრაზებს და ქმნიდა მტრულ სამუშაო გარემოს ქალებისთვის.

BBC-ის ინფორმაციით, გამოძიების ფარგლებში ქალებმა განაცხადეს, რომ კუომო მათი ნების წინააღმდეგ კოცნიდა და ისვამდა კალთაში. არსებული ინფორმაციით, მან სექსუალურად შეავიწროვა ერთ-ერთი სამხედრო მოსამსახურეც და მაისურის ქვეშ, მკერდზე შეეხო საკუთარ თანაშემწეს.

AP-ს ინფორმაციით, გამოძიებისას დაიკითხა 179 ადამიანი, რომელთა შორის იყვნენ შევიწროების მსხვერპლი ქალები, კუომოს ძველი და მოქმედი თანამშრომლები და თავად გუბერნატორი. გამომძიებლის განცხადებით, მათ იპოვეს 11 ქალი, რომელთა მონათხრობი შევიწროების შესახებ დადასტურდა სხვადასხვა მოწმის ჩვენებითა და მიღებული შეტყობინებებით.

კუომო ბრალდებებს უარყოფს და ამტკიცებს, რომ არასდროს შეხებია ვინმეს შეუსაბამოდ. შტატის რამდენიმე კანონმდებელმა, მათ შორის, კუომოს პარტიის წევრებმა განაცხადეს, რომ მან თანამდებობა უნდა დატოვოს.