საქართველოს პრეზიდენტის, სალომე ზურაბიშვილის განცხადებით, შარლ მიშელის შეთანხმების მიღწევაში შეტანილი წვლილით ამაყობს, თუმცა არ აიღებს პასუხისმგებლობას მუხლებზე, რომლებზეც მხარეები შეთანხმდნენ და არც დოკუმენტის ანულირებაზე. მისი თქმით, გაუგებარია პოსტფაქტუმ იმის აღმოჩენა, რომ შეთანხმების მუხლები მიუღებელი და ქვეყნისთვის დამაზიანებელი იყო.

ზურაბიშვილი ამბობს იმასაც, რომ თავად წითელი ხაზების გავლება ხელმოწერამდე იცის, რითიც მიანიშნებს ხელმომწერ პარტიებს, რომ ამაზე შეთანხმებამდე უნდა ეფიქრათ. სავარაუდოა, რომ პრეზიდენტმა ამ ფორმით გააკრიტიკა მმართველი გუნდის წევრები, რომლებმაც შეთანხმება ანულირებულად გამოაცხადეს.

"დღესაც ჩვენი არჩეული პარტნიორები და მათთან მჭიდრო თანამშრომლობა ჩვენი საუკეთესო დასაყრდენია, ჩვენი განვითარების საფუძველი და ჩვენი უალტერნატივო გზა დეოკუპაციისკენ. ამიტომ მიმაჩნია და ვუთხარი კიდეც მმართველი პარტიის წარმომადგენლებს, რომ დოკუმენტის მომზადების პროცესი უაღრესად პოზიტიური გახლდათ, რამეთუ ევროპული საბჭოს პრეზიდენტის და დღეს ევროკავშირის ერთ-ერთი მთავარი პოლიტიკური ფიგურის ჩართულობა საქართველოს პროცესებში, კავკასიასა და ზოგადად ევროკავშირის ახლო სამეზობლოში ჩვენთვის ძალიან მნიშვნელოვანია. ეს არის რეალური ხიდი ჩვენსა და ევროპას შორის. ეს უნდა გვესმოდეს, ვაფასებდეთ, ვიყენებდეთ და ვუფრთხილდებოდეთ.

მე პირადად ვიღებ ერთგვარ პასუხისმგებლობას და ვამაყობ კიდეც იმით, რომ ხელი შევუწყვე ევროკავშირის ჩართულობას მაშინ, როცა ქვეყანაში პოლიტიკური კრიზისი ჩიხში შედიოდა, თუმცა ვერ ავიღებ პასუხისმგებლობას დოკუმენტის ცალკეულ ელემენტებზე, რომლებიც იყი მხარეებს შორის შეთანხმებული და ვერც მის ანულირებაზე. თუმცა, დღეს პოსტფაქტუმ იმის აღმოჩენა, რომ თურმე ისეთი რაღაცები დავთმეთ, რაც მიუღებელი ყოფილა და რამაც შესაძლოა ქვეყანა დააზიანოს, გაუგებარია. ჩემი გამოცდილებიდან გამომდინარე წითელი ხაზების ხელმოწერამდე გავლება ვიცი", — განაცხადა ზურაბიშვილმა.

ზურაბიშვილი მიაჩნია, რომ პროცესი, რომელიც დგას ამ დოკუმენტის უკან, მიზნები, რომელსაც ეს დოკუმენტი ისახავს და პრინციპები, რომელსაც ეს დოკუმენტი ეფუძნება, ამოწურული არაა და წარმოადგენს იმ გზას, რომელიც ქვეყანამ აუცილებლად უნდა გაიაროს.

ზურაბიშვილი ამბობს, რომ იზიარებს შეთანხმების ხელმომწერი და პარლამენტში შესული პარტიების მიდგომას იმის შესახებ, რომ დოკუმენტმა თავისი პირველადი ფუნქცია შეასრულა. მისივე თქმით, არ იზიარებს მმართველი გუნდის შეფასებას, რითიც დოკუმენტის ანულირებას ხსნიან — თითქოს, პოლარიზაცია არ შესუსტებულა.

"გუშინ მოვუსმინე მე ყველას და მინდა ხაზგასმით აღვნიშნო იმ პარტიების პასუხისმგებლობით აღსავსე დამოკიდებულება, რომლებიც ამ შეთანხმების საფუძველზე შევიდნენ პარლამენტში, იმუშავეს და დღესაც მუშაობენ, ქმნიან მოდელს ან მოდელის საწყისს, თუ როგორი უნდა იყოს დეპოლარიზებული ქართული პოლიტიკური სპექტრი. ყოველ მათგანს მინდა ამისთვის მადლობა გამოვუცხადო. მეც ვიზიარებ მათ შეხედულებას, რომ დოკუმენტმა თავისი პირველადი ფუნქცია შეასრულა, პოლიტიკური კრიზისი დაასრულა, სტაბილურობა გამყარდა, მრავალპარტიული პარლამენტი შედგა და პოლიტიკურმა პროცესებმა ქუჩიდან გადაინაცვლა პარლამენტში, მივიღეთ ახალი საარჩევნო კოდექსი. დიდი იმედი მაქვს, რომ ბარიერის დაწევის შეთანხმებაც შესრულდება.

ამ დოკუმენტის შედეგია, რომ გარკვეულმა ოპოზიციურმა ძალებმა ქუჩაში ვერ გადაიტანეს პოლიტიკური პროცესები, დაკარგეს დესტაბილიზაციის ყოველგვარი რესურსი და ხელის არ მოწერით განიცადეს ერთგვარი მარგინალიზაცია! ამდენად, არ ვეთანხმები მმართველი პარტიის შეფასებას, რომ პოლარიზაცია არ შემცირებულა, რითაც ხსნის დოკუმენტის ანულირებას", — განაცხადა მან.

გარდა ამისა, ზურაბიშვილმა სიტყვით გამოსვლისას კიდევ ერთხელ გაუსვა ხაზი შეთანხმების შესრულების აუცილებლობას და მმართველი გუნდის წევრები და ოპოზიცის ნაწილი გააკრიტიკა. მან განაცხადა, რომ ჩვენ მოვითხოვთ უცხოეთისგან პატივისცემას და გვაღიზიანებს მათი მითითებები და კრიტიკა, თუმცა იმისთვის რომ პატივისცემა დავიმსახჯუროთ, სიტყვას პატივი უნდა ვცეთ და ნაკისრი ვალდებულებები შევასრულოთ.

ზურაბიშვილმა ისაუბრა იმაზეც, რომ არჩევნებზე უნდა იყოს დაცული გარემო. მისი თქმით, ქვეყანაში უნდა ჩატარდეს დემოკრატიული და სამართლიანი არჩევნები და ვერავინ უნდა შეძლოს ჩვენი ევროპული გზისათვის ზიანის მიყენებ შიგნით ან გარეთ

"ეს არჩევნები უნდა იყოს სამაგალითო, დაცული უნდა იყოს ყველა სუბიექტის უფლებები, რაც გამორიცხავს ძალადობას, სიძულვილისა და შეურაცხყოფის ენას, პირადი ცხოვრების მონაცემების გამოყენებას, კონკურენტის მოღალატედ გამოცხადებას, მედიისათვის პროფესიულ საქმიანობაში ხელის შეშლას, ფეიქნიუსების გავრცელებასა და სხვადასხვა სახის ზეწოლას", — განაცხადა მან.