"დავისახოთ მიზნად, რომ 2030 წელს საქართველოს ყველა მოქალაქე გამართულად ისაუბრებს ქართულ ენაზე", — განაცხადა პრემიერმინისტრმა შერიგების სამინისტროს 10-წლიანი გეგმის პრეზენტაციაზე. ირაკლი ღარიბაშვილის თქმით, ეს არის მთავრობის ერთ-ერთი კონკრეტული ამოცანა.

მისივე თქმით, დღეს ქვეყანაში პრობლემაა ის, რომ საქართველოს მოქალაქეებმა ქართული არ იციან. ამავდროულად ღარიბაშვილი "წარმატების" მაგალითსაც ასახელებს, რაც მისი აზრით, პარლამენტში ეთნიკური უმცირესობების წარმომადგენლების ყოფნაა.

"ეს არის ერთ-ერთი კონკრეტული მაგალითი და მე მინდა, ძალიან ბევრი ასეთი მაგალითი ვიხილო პარლამენტში, სამინისტროებში და ა.შ. ამისთვის, რა თქმა უნდა, წინაპირობა არის ის, რომ ქართული ენა შევასწავლოთ ყველა ჩვენს მოქალაქეს. დავისახოთ მიზნად, რომ 2030 წელს საქართველოს ყველა მოქალაქე გამართულად ისაუბრებს ქართულ ენაზე. აი, ეს არის ერთ-ერთი კონკრეტული ამოცანა", — აცხადებს ღარიბაშვილი.

ეთნიკური უმცირესობებით დასახლებულ რეგიონებში მოქალაქეები და ადგილობრივი ორგანიზაციები უკვე წლებია, საუბრობენ იმაზე, რომ განათლების სისტემა არ უზრუნველყოფს ისეთი პირობების შექმნას, რომელიც ყველას მისცემს ენის შესწავლის შესაძლებლობას. მათი თქმით, ეს აფერხებთ, როცა სახელმწიფო სტრუქტურებში სრულყოფილი მომსახურების მიღება სურთ.

ბოლო დღეების განმავლობაში მთავრობა 10-წლიან გეგმებს სამინისტროების მიხედვით წარადგენს. თუმცა, 2030 წელი ხელისუფლებაში ყოფნის სამიზნედ ბიძინა ივანიშვილმა ხელისუფლებაში მოსვლისთანავე გამოაცხადა.