შინაგან საქმეთა მინისტრის, ვახტანგ გომელაურის განცხადებით, მთაწმინდის ფერდობზე სავარაუდო ადევნების ფაქტზე შეტყობინება აქამდეც მიუღიათ. ფორმულას ინფორმაციით, იმ ტერიტორიაზე, სადაც ავსტრალიის მოქალაქის ცხედარი იპოვეს, სხვა ქალებს აქამდეც ადევნებიან.

"კი, რა თქმა უნდა, ორი შეტყობინება იყო, რომელზეც ფიზიკური ზეწოლა არ მომხდარა, "უბრალოდ ჩემკენ მოძრაობდა და გავიქეცით". მოვიყვანეთ, დავკითხეთ და ვმუშაობთ ამ მიმართულებითაც", — განაცხადა მან.

გომელაური არ ადასტურებს, რომ თავდამსხმელი ერთი და იგივე პიროვნებაა, მისი თქმით, ეს შეიძლება, სხვადასხვა იყოს.

31 ივლისს გავრცელდა ინფორმაცია, რომ თბილისში დაკარგული ავსტრალიის მოქალაქე, შანაე ბრუქსი მთაწმინდის ფერდობზე გარდაცვლილი იპოვეს.

შანაე ბრუქსის მეგობრები Facebook-ზე წერდნენ, რომ ის 30 ივლისს დღის მეორე ნახევრიდან, მთაწმინდის რაიონში სეირნობის შემდეგ დაიკარგა. ბრუქსის ერთ-ერთი მეგობრის თქმით, შანაე ბოლოს ტელეფონზე მეგობარს ელაპარაკებოდა, როდესაც მას მოულოდნელად თავს დაესხნენ, ის კი დახმარებისთვის ყვიროდა.

1-ლ აგვისტოს შანაე ბრუქსის გარდაცვალების საქმე განზრახ მკვლელობის მუხლით გადაკვალიფიცირდა.