დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, თუ ქვეყანაში მომდევნო სამი თვის განმავლობაში თვეში მილიონი აცრა ჩატარდება, პანდემიის ყველა მაჩვენებელს სრულად გადავლახავთ. ამის შესახებ მან იმუნიზაციის საბჭოს დასრულების შემდეგ მედიასთან ისაუბრა.

მისი თქმით, პანდემიის დასასრულებლად თვეში მილიონი აცრა არის იდეალური, თუმცა, 600 ათასი აცრითაც პანდემიის გადალახვა შესაძლებელი იქნება.

"თუ ჩვენ თითო თვეში მილიონ აცრას გავაკეთებთ, ანუ 3 თვეში 3 მილიონს, პანდემიის ყველა მაჩვენებელს სრულად გადავლახავთ. შემდეგი სამიზნე გვაქვს 800 000 აცრა ყოველ თვეში. მესამე, შედარებით მოკრძალებული სამიზნე გახლავთ 600 000 აცრა, 3 თვის განმავლობაში. მომდევნო სამი თვე ეპიდემიის დასამარცხებლად კრიტიკულია", — განაცხადა ამირან გამყრელიძემ.

საბჭოს სხდომის შემდეგ გამყრელიძემ განაცხადა, რომ ახლა გადავდივართ მესამე ტალღის შემდგომ პიკს, რომელიც შეიძლება გაგრძელდეს 10-14 დღე. 30 ივლისის მონაცემებით, საქართველოში კორონავირუსის 2 712 ახალი შემთხვევა დადასტურდა, გამოჯანმრთელდა 1 561, ხოლო გარდაიცვალა — 25 ადამიანი. დადებითობის დღიური მაჩვენებელი არის 6,93%, ბოლო 7 დღის მანძილზე — 7,09%, ხოლო 14 დღის მანძილზე — 6,59%.