ცენტრალურმა საარჩევნო კომისიამ გირჩის სარეფერენდუმო კითხვა არ დაარეგისტრირა. შეკითხვა გულისხმობდა კანაფის ან კანაფის პროდუქტების ლეგალიზებას ან დარეგულირებას ქართულ ბაზარზე.

გირჩის ლიდერის, ზურა ჯაფარიძის თქმით, ცესკოს არგუმენტი იყო ის, რომ საზოგადოებას არ ესმის კანაფის, მისი პროდუქტებისა და სიტყვა ლეგალიზაციის მნიშვნელობა, ასევე გაუგებარი იყო, რა იგულისხმებოდა რეგულირებულ დაშვებაში:

"ჩვენ გვქონდა განმარტება კითხვაში, სადაც გვეწერა, რომ რეგულირებად დაშვებაში ვგულისხმობდით, როგორც ეს ხდება თამბაქოსა და სპირტიანი სასმელების შემთხვევში".

ჯაფარიძე მიიჩნევს, რომ ცესკო იმ სისტემის ნაწილია, რომელიც, მისი თქმით, კანაფის აკრძალვით ხელს ითბობს:

"ცესკო სხვადასხვა პარტიის წევრებისგან შედგება. არ მოიძებნა არც ერთი პარტიის წარმომადგენელი, რომელიც ჩვენ დაგვიჭერდა მხარს. მათ შორის არც იმ პარტიის, რომლებიც თავს დებენ პროგრესულობაზე. ყველა წარმომადგენელი იქ იყო. არც ევროპულმა საქართველომ, არც ქართულმა ოცნებამ, არც ნაციონალურმა მოძრაობამ. ეს ყველა დადგა პატრიოტთა ალიანსისა და მრეწველობა გადაარჩენს საქართველოს გვერდით. ამ ხალხმა ჯამში თავჯდომარესთან [თამარ ჟვანია] ერთად, რომელიც წელიწადში რამდენიმე ასეულ ათას ლარს იღებს ბიუჯეტიდან და ჩვენი გადასახადებიდან, ყველამ ერთად გვითხრეს უარი".

ზურა ჯაფარიძის თქმით, ისინი დადგენილებას საქალაქო სასამართლოში გაასაჩივრებენ:

"ცესკოს კარგად არ აქვს გააზრებული, რას ნიშნავს ჩვენი გადაკიდება. ამოვთხრით ყველა იმიდან, სახეს ავახევთ საბოლოო ჯამში".

"უნდა ისჯებოდეს თუ არა საქართველოში ნარკოტიკების მოხმარება?" - ასეთი იყო გირჩის რეფერენდუმის კითხვა თავდაპირველად, რომელიც მოგვიანებით შეიცვალა და დაზუსტდა შემდეგი ფორმულირებით - "თანახმა ხართ თუ არა, რომ მოხდეს კანაფის და კანაფის პროდუქტების ლეგალიზაცია, ანუ ისევე რეგულირდებოდეს, როგორც თამბაქო და სპირტიანი სასმელები?".