საერთაშორისო გამჭვირვალობა — საქართველოს განცხადებით, ცესკოს ახალი თავმჯდომარის და წევრების შერჩევის პროცესი საარჩევნო ადმინისტრაციის მიმართ ნდობას ვერ აღადგენს. TI-ს თქმით, ხელისუფლების ქმედებები ცხადყოფს, რომ მათი მიზანი არ არის ამ თანამდებობების პოლიტიკური კონსენსუსით დაკომპლექტება, ამიტომ კვლავ პრობლემური დარჩება ცესკოს მიმართ პოლიტიკური პარტიების ფართო სპექტრის და საზოგადოების მხრიდან ნდობის საკითხი.

ორგანიზაციის ცნობით, ასეთი ვარაუდი მას შემდეგ გაჩნდა, რაც ქართულმა ოცნებამ ცესკოს თავჯდომარისა და წევრების 76 ხმით არჩევის შესაძლებლობა გაამარტივა და შეამცირა დროის ის ხანგრძლივობა, რაც მიშელის დოკუმენტით იყო გათვალისწინებული პოლიტიკური კომპრომისის მისაღწევად.

"ეს ვარაუდი კიდევ უფრო გაამყარა პრეზიდენტის მიერ შექმნილი საკონკურსო კომისიის შემადგენლობამ, რომელმაც საბოლოოდ ისეთი კანდიდატების წარდგენას დაუჭირა მხარი, რომელთაც არც საარჩევნო საკითხებზე მომუშავე წამყვანი არასამთავრობო ორგანიზაციების წარმომადგენლებმა მისცეს ხმა და არც საპარლამენტო ოპოზიციამ. სამივე კანდიდატი ცესკოს მოქმედი თანამშრომელია, რომელთაც გასაუბრების დროს ძალიან გაუჭირდათ, ცესკოს წარსული საქმიანობის კრიტიკულად შეფასება", — ვკითხულობთ განცხადებაში.

მათი განცხადებით, პოლიტიკური კონსენსუსის გარეშე, შარლ მიშელის დოკუმენტის დარღვევით, ცესკოს დაკომპლექტება კიდევ უფრო გააღრმავებს საარჩევნო ადმინისტრაციის მიმართ უნდობლობას, რაც უარყოფითად აისახება ქვეყანაში არსებულ საარჩევნო გარემოზე და ეჭვქვეშ დააყენებს იმ მოლოდინს, რომ საარჩევნო პროცესები სამართლიან და კონკურენტულ გარემოში წარიმართება.