რამდენიმე დღის წინ The Body Shop-მა "ქალების გაძლიერებაზე" წიგნი გამოსცა, რომლის 7-ვე ავტორი კაცია. წიგნს სახელად შეიყვარე თავი შენი ჰქვია. ორგანიზატორები აცხადებდნენ, რომ მისი მიზანი ქალთა გაძლიერება და სტანდარტებისგან გათავისუფლებაა და მასში 13 ქალის რეალური ისტორიაცაა მოცემული.

კომპანიის ინიციატივას, რომ 7-დან არც ერთი ქალი ავტორი არ ჰყავდა წიგნს, რომელიც ქალების პრობლემებს და გაძლიერებაზე უნდა ყოფილიყო, კრიტიკა მოჰყვა. ამაზე საპასუხოდაც ორგანიზაციამ თავდაპირველად განმარტა, რომ მათი მიზანი იყო კაცებს ქალების ადგილას წარმოედგინათ თავი. მოგვიანებით მათ პოსტი წაშალეს, დღეს კი ბოდიში მოიხადეს:

"გულწრფელად ვწუხვართ, რომ პროექტის ერთ-ერთი იდეა, კაცებს დაეწერათ ნოველები, არ აღმოჩნდა სწორი გზა ჩვენი სათქმელის გადმოსაცემად. ჩვენი მიზანი იყო დაგვეწყო ამ თემაზე ფიქრი და დისკუსია არა მხოლოდ ქალებს, არამედ მამაკაცებსაც".

კომპანია აცხადებს, რომ მათი პროექტის მიზანი ქალების ისტორიების გავრცელებაა და აპირებენ, რომ დაწყებული პროექტი ბოლომდე მიიყვანონ:

"არაერთი გულშემატკივრისგან მოვისმინეთ განსხვავებული აზრი და შენიშვნა. ეს კიდევ ერთხელ გვარწმუნებს იმაში, რომ კომუნიკაციის სწორი ფორმა ვერ შევარჩიეთ".

წიგნის ავტორები არიან გიორგი კეკელიძე, ბასა ჯანიკაშვილი, დათო გორგილაძე, ალექსანდრე ლორთქიფანიძე, ირაკლი შამათავა, გია მურღულია და ტორესა მოსი.

კრიტიკას წიგნის ავტორების ნაწილი გამოეხმაურა, ტორესა მოსიმ და ალექსანდრე ლორთქიფანიძემ განაცხადეს, რომ პროექტს კარგად არ იცნობდნენ.

წიგნის ერთ-ერთი ავტორი, პარლამენტის ეროვნული ბიბლიოთეკის დირექტორი და მწერალი, გიორგი კეკელიძე რამდენიმე ქალმა სექსუალურ შევიწროებაშიც დაადანაშაულა. ამის შესახებ სხვადასხვა ჯგუფში წარსულში არაერთხელ დაწერილა, თუმცა ქალებმა საჯაროდ საუბარი მას შემდეგ დაიწყეს, რაც ის ერთ-ერთი იყო იმ 7 კაცი მწერალიდან, რომელსაც "ქალების გაძლიერებაზე" წიგნი დააწერინეს.