2021 წლის 30 ივნისის მდგომარეობით, სახელმწიფო საგარეო ვალის მოცულობამ 25 334 685 000 ლარს მიაღწია, როდესაც 2020 წლის ბოლოსთვის ეს მაჩვენებელელი 24 689 731 000 ლარი იყო — შესაბამისად, საქართველოს სახელმწიფოს საგარეო ვალი ბოლო 6 თვეში 645 მილიონი ლარით არის გაზრდილი.

დღეს ქვეყნის პრემიერმინისტრმა, ირაკლი ღარიბაშვილმა განაცხადა, რომ 2021 წელს მთავრობას "არც ერთი თეთრის, არც ერთი ლარის ვალი არ აუღია". მოგვიანებით, ეკონომიკის მინისტრმა, ნათია თურნავამ ჟურნალისტებთან განმარტა, რომ ქვეყანას 2021 წელს პანდემიის მართვისთვის ახალი სავალო ხელშეკრულება არ გაუფორმებია — როგორც ჩანს, ღარიბაშვილი სწორედ ამაზე საუბრობდა. მინისტრის თქმით, არსებობს გრძელვადიანი ხელშეკრულებები, რომელთა ფარგლებშიც გარკვეული თანხები ახლაც ირიცხება.

ფინანსთა სამინისტროს ინფორმაციით, მიმდინარე წლის 30 ივნისის მდგომარეობით, სახელმწიფო ვალის მთლიანი მოცულობიდან 23,8 მილიარდი ლარი მთავრობის, ხოლო 1,5 მილიარდი ლარი ეროვნული ბანკის ვალია.

ქვეყნებს შორის ყველაზე მეტი ოდენობის ვალდებულება გერმანიისა (2,2 მილიარდი ლარი) და საფრანგეთის (1,76 მილიარდი ლარი) მიმართ გვაქვს.

რაც შეეხება მრავალმხრივ კრედიტორებს, აქ მსოფლიო ბანკი (IDA და IBRD) — 6,5 მილიარდი ლარითა და აზიის განვითარების ბანკი (ADB) — 3,56 მილიარდი ლარით ლიდერობენ.