საქართველოს პრემიერმინისტრი, ირაკლი ღარიბაშვილი ქვეყანაში კორონავირუსით ინფიცირებულთა ზრას რამდენიმედღიან აქციებს აბრალებს და საპროტესტო შეკრებებს უპასუხისმგებლოს უწოდებს. ამის შესახებ ღარიბაშვილმა მთავრობის სხდომაზე ისაუბრა.

"ყურადღებით ვაკვირდებით ბოლო დღეების განმავლობაში მიმდინარე დინამიკას. მოგეხსნებათ, რომ, პრაქტიკულად, გაორმაგება მოხდა ბოლო ორ კკვირაში ინფიცირებულთა და დაღუპულთა რაოდენობის. აქვე მინდა აღვნიშნო, სავსებით სამართლიანად, რომ უპასუხისმგებლო რამდენიმედღიანი აქციების შედეგიც არის პირდაპირ ის, რაც მოხდა და ამ აქციების შემდეგ მოხდა, პრაქტიკულად, გაორმაგება ინფიცირებულთა რაოდენობის. კიდევ ერთხელ მინდა მოვუწოდო მოსახლეობას, რომ გამოვიჩინოთ ზედმეტი ყურადღება, სიფრთხილე. ასევე, პასუხისმგებლობით მოვეკიდოთ ჩვენ აქტივობას, იქნება ეს ნებისმიერი თუ ხალხმრავალი შეკრებები", — განაცხადა ღარიბაშვილმა.

26 ივლისის მონაცემებით, საქართველოში კორონავირუსის 1 264 ახალი შემთხვევა დადასტურდა, გამოჯანმრთელდა 1 665, ხოლო გარდაიცვალა — 26 ადამიანი.

ბოლო 24 საათში ქვეყნის მასშტაბით ჩატარდა 19 375 კვლევა ტესტით, მათ შორის ანტიგენის სწრაფი ტესტით — 9 807, ხოლო PCR-ით — 9 568.

Stopcov.ge-ზე გამოქვეყნებული ინფორმაციის თანახმად დადებითობის დღიური მაჩვენებელი არის 6.52%, ბოლო 7 დღის — 6.44%, ხოლო 14 დღის — 5.73%.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 404 023-ს. ვირუსს ჯამში ემსხვერპლა 5 714, ხოლო გამოჯანმრთელდა 374 753 ადამიანი.