ოდესმე იტალიის რომელიმე წყნარ ქალაქში ცხოვრებაზე, მშვიდი კაფეს გახსნასა და პატარა აივნიდან მშვენიერი ხედით ტკბობაზე თუ გიოცნებია? კალაბრიის რეგიონის ახალი ინიციატივა ამ ოცნებების ახდენას ემსახურება. რეგიონი რამდენიმე ქალაქში ცხოვრების მსურველებს სამი წლის განმავლობაში $33 000-ს გადაუხდის.

ბოვა

ჩივიტა, ბოვა, ალბიდონა, აიეტა, სან დონატო დიდი ნინეა და სხვა ქალაები ახალ მაცხოვრებლებს ეძებენ. აღნიშნული ინიციატივა იმ დასახლებებზე ვრცელდება, რომლებშიც მოსახლეობის რაოდენობა 2 000-მდე აღწევს და თანდათანობით მცირდება. ინიციატივის მიზანი პატარა ქალაქების აღორძინებაა.

სან დონატო დი ნინეა

იმისათვის, რომ კალაბრიის ქალაქში დასახლდეთ და $33 000 მიიღოთ, რამდენიმე პირობის შესრულებაა აუცილებელი. თანხის მისაღებად მცირე ბიზნესი უნდა წამოიწყოთ ან კონკრეტულ სფეროებში უკვე არსებულ სამუშაო ადგილებს დასთანხმდეთ. აპლიკაციის შესავსებად 40 წლამდე უნდა იყოთ და საცხოვრებლად გადასვლა დადებითი პასუხის მიღებიდან 90 დღეში შეგეძლოთ.

აიეტა

ჯერჯერობით თანხის გადანაწილების სქემა ბოლომდე ჩამოყალიბებული არაა და ინიციატორები იმასაც განიხილავენ, რომ სიაში ის ქალაქებიც დაამატონ, რომლებშიც მოსახლეობა 3 000 ადამიანს აღწევს. აპლიკაცია და ინიციატივაში მონაწილეობის მისაღებად საჭირო პირობები რამდენიმე კვირაში გამოქვეყნდება. სიახლეებს შეგიძლიათ, თვალი რეგიონის ვებგვერდზე ადევნოთ.

"ჩვენი მიზანია განვავითაროთ ადგილობრივი ეკონომიკა და ახალი სიცოცხლე შთავბეროთ მცირე დასახლებებს", — ამბობს კალაბრიის რეგიონის საბჭოს წევრი.

კალაბრიის დაახლოებით 320 ქალაქში მოსახლეობის რაოდენობა 5 000-ზე ნაკლებია, რაც იმის საშიშროებას ქმნის, რომ ზოგიერთი ქალაქი მალე მთლიანად დაცარიელდება.