ქართული ოცნების დეპუტატის, ნინო წილოსანის განცხადებით, როცა შალვა პაპუაშვილმა ნაციონალური მოძრაობის წევრი, თინა ბოკუჩავა ძალის გამოყენებით ტრიბუნიდან გამოიყვანა, დაიცვა პარლამენტის თავმჯდომარე შესაძლო რისკებისგან. მისი თქმით, ბოკუჩავას შეიძლება "საღებავი შეესხა ან საწამლავი დაესხა".

"რა თქმა უნდა, შალვა პაპუაშვილს მისი უშუალო დანიშნულებიდან და უფლებამოსილებიდან გამომდინარე, შეიძლება, ეს არ ევალებოდა, მაგრამ მან თავისი განზრახვით უბრალოდ დაიცვა პარლამენტის თავმჯდომარე იმ რისკისგან, რომელიც შეიძლება ყოფილიყო და ეს რისკი იყო. შეიძლება საღებავი შეესხა, შეიძლება საწამლავი დაესხა, ჩვენ ხომ ვიცით, ეს ყველაფერი ხომ მოტანილი არ არის? ეს გამოგვივლია. მათ შორის მათ წარმომადგენელმა ქალებმა პარლამენტში დაასხეს საწამლავი და დაწამლეს იქ ხალხი. ანუ რატომ იყო ეს არალოგიკური, რომ რაღაც სასწაული გაეკეთებინა, ვერ ვხვდები", — თქვა წილოსანმა პალიტრანიუსის ეთერში.

18 ივლისს ქართული ოცნების დეპუტატმა, შალვა პაპუაშვილმა ნაციონალური მოძრაობის წევრი, თინა ბოკუჩავა პარლამენტის ტრიბუნიდან ძალის გამოყენებით გაიყვანა. 18 ივლისს პარლამენტში შინაგან საქმეთა მინისტრი, ვახტანგ გომელაური მივიდა. მას მედიისა და ოპოზიციის წარმომადგენლები პროტესტით დახვდნენ. მინისტრის სიტყვით გამოსვლის დაწყებისთანავე ჟურნალისტებმა პლენარული სხდომის დარბაზში გადმოფინეს ბანერი წარწერით — "დასაჯეთ მოძალადეები".

პარალელურად, ოპოზიციონერმა დეპუტატებმა გომელაურს სიტყვა შეაწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გაშალეს.

თუმცა მმართველმა პარტიამ გომელაურის საპარლამენტო მოსმენა გადადო, მიზეზად კი მედიის წარმომადგენლების და ოპოზიციის პროტესტი დაასახელა.