საქართველოს პრემიერმინისტრ ირაკლი ღარიბაშვილის შემდეგ, კრიტიკულ მედიას საქართველოს საპატრიარქოც ბლოკავს. ისინი არასასურველი ტელევიზიების ჟურნალისტებთან კომუნიკაციის შესაზღუდად ტაძრის ეზოს შესასვლელთან განცხადებების გაკვრას გეგმავენ. საპატრიარქოს განცხადებით, ცალკეულ ადამიანს თუ ტაძრის წინამძღვარს შეუძლია, წერილობით მიმართოს ამა თუ იმ ტელეარხის ხელმძღვანელობას და შეატყობინოს, რომ არ სურს ჟურნალიტებთან კომუნიკაცია, რადგან დამაბრკოლებელი გარემოებები ექმნება.

საპატრიარქო ირწმუნება, რომ შეზღუდვები "გარკვეული ძალების მიერ საქართველოს ეკლესიაზე სერიოზული შეტევის" გამო მიიღეს.

მათივე თქმით, "მართალია, გარკვეულ გადაცდომას ერთეული სასულიერო პირის მხრიდან ჰქონდა ადგილი", მაგრამ, საპატრიარქოს აზრით, კერძო შემთხვევის განზოგადება და საერთოდ ეკლესიის მსახურთა მოძალადეობაზე აქცენტის გაკეთება მიზანმიმართულად ხდება.

საპატრიარქოს მტკიცებით, სამი ტელეკომპანია "პროვოკაციული კითხვებით ცდილობს წონასწორობა დააკარგვინონ რესპოდენტს, შემდეგ კი, კონტექსტიდან ამოგლეჯილ, დამონტაჟებულ ისეთ სიუჟეტებს უშვებენ, რომ მაყურებელმა სასულიერო პირი მოძალადედ აღიქვას".

ძალადობრივი ჯგუფების ქმედებების კიდევ უფრო წახალისებად აფასებს საპატრიარქოს განცხადებას საქართველოს ჟურნალისტური ეთიკის ქარტია. ქარტიის დირექტორი, მარიამ გოგოსაშვილი On.ge-სთან ამბობს, რომ საპატრიარქოსგან ეს განცხადება, ისევე როგორც მთავრობის აქამდე გაკეთებული აგრესიული რიტორიკა, მედიაზე და მათ მუშაობაზე უარყოფითად აისახება.

"საპატრიარქოს განცხადება კიდევ უფრო ახალისებს ძალადობრივი ჯგუფების ქმედებებს. ვფიქრობ, საპატრიარქოსგან ეს განცხადება, ისევე, როგორც მთავრობის აქამდე გაკეთებული აგრესიული რიტორიკა, მედიასაშუალებებზე და მათ მუშაობაზე უარყოფითად აისახება. ორივე მათგანის განცხადებები, ფაქტობრივად, ძალადობრივი ჯგუფების ქმედებებს", — აცხადებს მარიამ გოგოსაშვილი.

მისივე თქმით, კანონში პირდაპირი არ არის ჩანაწერი ტაძრის ეზოს ტერიტორიაზე რომელი სამართლებრივი ნორმები მოქმედებს. ქარტიის დირექტორი აღნიშნავს, რომ შესაძლოა, საპატრიარქოს ამ განცხადებამ შემდგომში სამართალდამცავი ორგანოების ქმედებაზეც მოახდინოს ერთგვარი გავლენა და მედია საფრთხის წინაშე დადგეს.

ჰომოფობიური და ძალადობრივი ჯგუფების თავდასხმის შედეგად 5 ივლისს 53 ჟურნალისტი დაშავდა. მათგან ერთი TV პირველის ოპერატორი, ლექსო ლაშქარავა 11 ივლისს გარდაიცვალა.

ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს მოძრაობა სირცხვილიას ოფისში შეჭრის მცდელობისას დაესხნენ. ლაშქარავა ჯერ კიდევ საავადმყოფოში იმყოფებოდა, როცა On.ge-ს შემთხვევის დეტალები მოუყვა.

"უბრალოდ კიბეზე შეგვეფეთნენ, ჟურნალისტზე გაიწიეს ჯერ და შემდეგ ჩამქოლეს. არ ვიცი, 50 კაცი მირტყამდა, მთელი კიბის საფეხური, ზედა ნაწილი, ქვედა ნაწილი. რაღაც ნაწილი ავიდა ზევით, დავიწყე გაყოლა. რამდენიმე სართულზე იყვნენ ესენი, რამდენიმე სართულმა მცემა. ჩამაგდეს, ქვევით გადამაგდეს და ისე მცემეს, ტექნიკა დააქუცმაცეს, არ ვიცი, ასეთი შთაბეჭდილება მრჩება, რომ უნდოდათ მედია გამოეყვანათ მწყობრიდან [...]

ახლა მე მეძახიან ამოცნობაზე მოდიო, მაგრამ ორი დღე კიდევ აქ უნდა ვიყო, ვერ გავდივარ და იდენტიფიცირება წარმოუდგენელია მოვახდინო, იმიტომ, რომ 50-60 ადამიანი იყო", — ყვებოდა ლაშქარავა 6 ივლისს, თავდასხმიდან მეორე დღეს.

მედიის წარმომადგენლები 6 ივლისსაც დაშავდნენ. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დღის ბოლოს კი, შსს-მ თქვა, რომ დაკავებული იყო მხოლოდ 8 პირი და ყველა მათგანი ადმინისტრაციული წესით.

რაც შეეხება 6 ივლისის აქციას, ამ შემთხვევაში პოლიცია მოძალადეებს აქტიურად აკავებდა, თუმცა ისინი მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც.

ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან შეიკრიბნენ და იმუქრებოდნენ, რომ ღირსების მარშის ჩატარებას არ დაუშვებენ. ისინი თავს დაესხნენ სირცხვილიას და თბილისი პრაიდის ოფისებს, ასევე, სავარაუდოდ, ასაფეთქებელი საშუალება შეაგდეს ერთ-ერთი არასამთავრობო ორგანიზაციის ოფისში, რის შედეგადაც ერთი ადამიანი დაშავდა.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტ-ინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიიყვანეს ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.

შსს-ს ინფორმაციით, 5 ივლისს მედიის წარმომადგენლების მიმართ განხორციელებული ძალადობის ფაქტებზე დაწყებული გამოძიების ფარგლებში სამართალდამცველებმა სულ 20 პირი დააკავეს, მათ შორის 5 — TV პირველის გადამღებ ჯგუფზე ფიზიკური და სიტყვიერი შეურაცხყოფისთვის.

აღანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.

გაიგე მეტი:

• ის ქმედებები, რაც თქვენ წარგედგინათ, დანაშაულია, არის სრული სიბნელე და სირცხვილი — მოსამართლე ძალადობრივი კონტრაქციის მონაწილეებს