საზოგადოებრივი მაუწყებლის სამეურვეო საბჭოს წევრი, ბონდო მძინარაშვილი 5 ივლისის ძალადობრივი კონტრაქციიდან ორი კვირის შემდეგ ძალადობრივ და პრორუსულ ალტ-ინფოში მივიდა. მისი თქმით, ეთანხმება პატრიარქის თანამოსაყრდე შიოს წინადადებას, რომ რელიგიური გრძნობების შეურაცხყოფა დასჯადი უნდა გახდეს.

"პოლიტიკოსებმა, ე.წ. მედასავლეთეებმა ამას უნდა მიაქციონ ყურადღება. როცა ქვეყნის მოსახლეობის აბსოლუტური უმრავლესობა არის მართლმადიდებელი ქრისტიანი, შენ ის არ უნდა შეურაცხყო, მისი რელიგიური გრძნობები. მეუფე შიო გამოვიდა და თქვა, საკანონმდებლო ინიციატივის დონეზე უნდა განიხილებოდეს პროექტი იმის თაობაზე, რომ რელიგიური და ეროვნული გრძნობების შეურაცხყოფა გახდეს დასჯადი. მე ამას ვეთანხმები [...] რელიგიური გრძნობების შეურაცხყოფის დასჯადობაზე როდესაც ლაპარაკობს მეუფე შიო, აქ მარტო მართლმადიდებლების რელიგიური გრძნობების შეურაცხყოფაზე კი არ არის ლაპარაკი, აქ არის კათოლიკეების, იუდეველების, მუსლიმანების, იგივე იმ სექტების...", — აცხადებს ის.

ამასთან, მძინარაშვილმა საზოგადოების ნაწილის სურვილს ალტ-ინფოს დახურვის შესახებ, "ლიბერტარიანული ფაშიზმის დამყარების მცდელობა" უწოდა.

"მოთხოვნები, რომელსაც მე ამ დღეების განმავლობაში ვისმენდი ალტ-ინფოს მიმართ, ეს არის ლიბერტარიანული ფაშიზმის დამყარების მცდელობა, არცერთ შემთხვევაში არ შეიძლება ვინმეს თავში მოუვიდეს რომელიმე მედია საშუალების აკრძალვა, ეს არის იმდენად წარმოუდგენელი მოწოდებები, რასაც ჩვენ რამდენიმე, მართლა მარგინალი ადამიანისგან ამ დღეებში ვისმენდით, რომ წარმოუდგენელია ამის განხორციელება იმ საზოგადოებაში, რასაც დღევანდელი ქართული საზოგადოება ჰქვია", — განაცხადა მძინარაშვილმა.

მან გააკრიტიკა ქართული მედია და ჟურნალისტები, მათ "მიკერძოებული", "დესტრუქციული", "პარტიული დღის წესრიგით მოქმედი" მედია უწოდა. მისივე მტკიცებით, ექსპრეზიდენტი, მიხეილ სააკაშვილი ყველაფერს აკეთებს იმისთვის, რომ "პროფესია ჟურნალისტი მოკლას".

ბონდო მძინარაშვილი საზოგადოებრივი მაუწყებლის წევრია, რომელიც ხელფასს ბიუჯეტიდან იღებს. ალტ-ინფო ძალადობრივი და პრორუსული არხია, რომელიც სიძულვილის გავრცელებას სხვადასხვა არხით ცდილობს. თავდაპირველად ის მხოლოდ ინტერნეტში "მუშაობდა", შემდეგ კი ტელევიზიაც დააფუძნეს და კომუნიკაციების კომისიამ მათ მაუწყებლობის უფლება მისცა.

ალტ-ინფოს Facebook გვერდი არაერთხელ დაბლოკილა, წაშალეს მათთან დაკავშირებული ქსელიც. ისინი რამდენჯერმე ხელახლა დარეგისტრირდნენ და სხვა პლატფორმების გამოყენება დაიწყეს. 11 ივლისს კი, ალტ-ინფოს ვებგვერდიც გაუთიშეს. სწორედ ალტ-ინფო იყო 5 ივლისის ძალადობრივი კონტრაქციის თანაორგანიზატორი და შემსრულებელი. მათი ტელეგრამის არხში აქტივისტების მიმართ ფიზიკური ანგარიშსწორებისა და სიცოცხლის მოსპობის მუქარები ვრცელდებოდა.

მძინარაშვილი საქართველოს საზოგადოებრივი მაუწყებლის სამეურვეო საბჭოს წევრი 2020 წლის პირველ ივლისს გახდა. იგი წლები წარმოადგენდა ობიექტივს, რომელიც პრორუსული პატრიოტთა ალიანსის პარტიული ტელევიზიაა. გარდა ამისა 22 ოქტომბერს მისი პოსტი, რომელიც ზუგდიდში მომხდარ თავდასხმას ეხებოდა, ფეისბუქმა დეზინფორმაციად მონიშნა. მძინარაშვილი აცხადებდა, რომ შეიარაღებული თავდასხმა "სპეციალურად წინასაარჩევნოდ მოწყობილი ტერორ-სპექტაკლი" იყო.