Wikileaks-ზე ახალი დოკუმენტები გამოქვეყნდა, რომელიც ამჯერად აშშ-ს დაზვერვის ცენტრალური სააგენტოს კიბერ ოპერაციებსა და პროტოკოლებს ეხება. აღნიშნული დოკუმენტებით ირკვევა, რომ CIA-ს ნებისმიერ მოწყობილობაში შეღწევა შეუძლია, დაწყებული iPhone-ებიდან, დამთავრებული Samsung-ის სმარტ ტელევიზორებით და ანდროიდის ტელეფონებით.

გარდა ამისა, ირკვევა, რომ სააგენტოს აქვს შესაძლებლობა მესიჯები მანამდე წაიკითხოს ვიდრე Facebook, WhatsApp, Signal, Telegram, Confide და სხვა მსგავსი საკომუნიკაციო არხები მათ კრიპტირებას მოახდენენ.

აღნიშნულ ინფორმაციას ტვიტერზე გამოეხმაურა Telegram-ის ოფიციალური არხი. მათი თქმით, პრობლემა ტელეფონებშია და არა აპლიკაციაში.

ანუ CIA აღწევს სმარტფონებში და ინფორმაციას მანამდე "იპარავს", ვიდრე მესიჯი, იქნება ეს ტექსტური თუ ხმოვანი, კონკრეტული აპლიკაციის დაშიფვრის პროცესს გაივლის.

Wikileaks-ის მიერ დოკუმენტების გამოქვეყნება შემაშფოთებლად მიაჩნიათ აშშ-ში. ისინი ფიქრობენ, რომ ამ ინფორმაციის საფუძველზე სხვადასხვა ქვეყნების მთავრობები შეძლებენ და გამოიკვლევენ არა მარტო იმას თუ რომელი მოწყობილობები დაჰაკა CIA-მ, არამედ ვინ არის მათი აგენტი; ეს კი საფრთხეს შეუქმნის სააგენტოს ოპერაციებს ისეთ ქვეყნებში, როგორებიცაა რუსეთი, ირანი და ჩრდილოეთ კორეა.