ყაზახეთის მოქალაქის, 26 წლის ასელ აიტპაევას გაუპატიურებასა და თვითმკვლელობამდე მიყვანაში ბრალდებული, ბესიკ თორდუა საავადმყოფოში გარდაიცვალა. ინფორმაცია ამის შესახებ On.ge-ს კლინიკა ვივამედში დაუდასტურეს, სადაც ის მკურნალობდა.

საავადმყოფოს კლინიკური დირექტორის, ზურაბ ჩხაიძის თქმით, ის 14 ივლისს გარდაიცვალა, მიზეზი ამ ეტაპზე უცნობია.

მიმდინარე წლის 7 მაისს ასელ აიტპაევას გაუპატიურებისა და თვითმკვლელობამდე მიყვანის საქმეზე თორდუას ბრალი წარედგინა, რაც სასჯელის სახედ და ზომად 8-დან 10 წლამდე თავისუფლების აღკვეთას ითვალისწინებს. მას აღკვეთის ღონისძიების სახით პატიმრობა ჰქონდა შეფარდებული.

შინაგან საქმეთა სამინისტროს მიერ ჩატარებული გამოძიებით დადგინდა, რომ 5 მაისს, თბილისში, ბესიკ თორდუამ ფსიქოლოგიური ზემოქმედებითა და სიცოცხლის მოსპობის მუქარით ასელ აიტპაევა გააუპატიურა.

განახლება:

პენიტენციური სამსახურის ინფორმაციით, ბესიკ თორდუას სამედიცინო შემოწმებისას არტერიული ჰიპერტენზია დაუდგინდა, რის გამოც მუდმივად ექიმების მეთვალყურეობის ქვეშ იყო. 30 ივნისს გონების დაკარგვის გამო სასწრაფო დახმარების ბრიგადამ კლინიკაში გადაიყვანა, სადაც თავის ტვინის ინფარქტი დაუდგინდა. საჭირო გახდა სასწრაფო ოპერაციის გაკეთება. ოპერაციის შემდეგ მისი მგდომარეობა იყო მძიმე და არასტაბილური.

"მიუხედავად ჩატარებული მკურნალობისა, პაციენტის მდგომარეობა კიდევ უფრო დამძიმდა, 14.06.21-ში დაფიქსირდა ბრადიარითმია, რომელიც მალევე გადავიდა ასისტოლიაში. დაწყებულ იქნა გულ-ფილტვის რეანიმაცია პროტოკოლის სრული დაცვით, თუმცა გულის მექანიკური ფუნქციის აღდგენა ვერ მოხერხდა და დაფიქსირდა ბიოლოგიური სიკვდილი", — აცხადებენ პენიტენციურ სამსახურში.