სამაუწყებლო კომპანია რუსთავი 2 დღეიდან რადიკალური და ძალადობრივი ჯგუფების მიერ ორგანიზებულ არც ერთ ღონისძიებას აღარ გააშუქებს. ამის შესახებ საგანგებო განცხადებას ტელეკომპანია რუსთაველის გამზირზე ჟურნალისტებზე ძალადობის გამო ავრცელებს, რა დროსაც ათობით ჟურნალისტი დაშავდა.

"ჩვენი ტელეკომპანიის ეთერი არასოდეს აღარ დაეთმობა პირებს და მათ ლიდერებს, რომლებიც ღიად იყენებენ სიძულვილის ენას, მოუწოდებენ ძალადობისა და აგრესიისკენ, აკეთებენ ჰომოფობიურ, ქსენოფობიურ თუ სხვა მსგავსი შინაარსის განცხადებებს", — ნათქვამია განცხადებაში.

ამასთან, რუსთავი 2 მოუწოდებს შსს-ს, დაუყოვნებლივ გამოიძიოს ტელეკომპანიის თანამშრომლების წინააღმდეგ ჩადენილი სისხლის სამართლის დანაშაულები.

"ტელეკომპანია ძალოვან უწყებას მიაწვდის ფიზიკური ძალადობის ამსახველ ვიდეომასალას, სადაც თავდამსხმელთა იდენტიფიცირება მარტივია. რუსთავი 2 აუცილებლად ყურადღებით დააკვირდება გამოძიების პროცესს, ვიდრე ყველა დამნაშავე კანონის წინაშე არ აგებს პასუხს", — აცხადებს ტელეკომპანია.

აღსანიშნავია, რომ დღეს რუსთაველზე მედიის წარმომადგენელთა წინააღმდეგ განხორციელებული ძალადობრივი ქმედებების გამო, სამი ტელეკომპანიის — მთავარი არხის, ფორმულას და TV პირველის ხელმძღვანელებმა ერთობლივი გადაწყვეტილება მიიღეს, თავად უზრუნველეყოთ ჟურნლისტთა უსაფრთხოება და გადამღები ჯგუფები ადგილიდან გამოეყვანათ.