ფოთისა და ხობის მიტროპოლიტი გრიგოლ ბერბიჭაშვილი ამბობს, რომ თბილისი პრაიდის გამართვა არ მოსწონს, თუმცა ეს არაფერს ნიშნავს. როგორც მან ჟურნალისტს უპასუხა, ეს სახელმწიფოს გადასაწყვეტია.

"აი, საქმეც ეს არის, დღევანდელი პრობლემა არ არის. თქვენ ერთ მღვდელმთავარს ეკითხებით უნდა მიეცეთ თუ არა უფლება. ეს სახელმწიფოს გადასაწყვეტია. მე ერთი კაცი გეტყვით, რომ არ მომწონს, მაგრამ ჩემი არმოწონება არაფერს ნიშნავს. ვიღაცას მე არ მოვწონვარ და ახლა რა ვქნათ, როგორ მოვიქცეთ?" — უპასუხა სასულიერო პირმა.

პირველ ივლისს თბილისი პრაიდის კვირეული დაიწყო. უკვე გაიმართა ფილმის ჩვენება და თბილისი პრაიდ ფესტივალი. ორივე ღონისძიებაზე მობილიზებული იყვნენ ჰომოფობიური და ძალადობრივი ჯგუფები, რომლებიც აგრესიულად იყვნენ განწყობილნი და ღონისძიებების ჩაშლას ცდილობდნენ, თუმცა პოლიციამ მათ ამის საშუალება არ მისცა.

თბილისი პრაიდის კვირეული 5 ივლისს ღირსების მარშით დასრულდება. ამ დღეს მობილიზებას აპირებენ ძალადობრივი ჯგუფებიც. გარდა ამისა, მარშის საწინააღმდეგო აქცია დაგეგმა საპატრიარქომაც.

საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.