თანასწორობის მოძრაობის ხელმძღვანელი, დავით კახაბერი ამბობს, რომ რიონის ხეობის აქტივისტების განცხადება შეურაცხმყოფელია. მისივე თქმით, სამწუხაროა, რომ ადამიანები, რომელთაც მხარს უჭერდა, მსგავსი შინაარსის განცხადებას ავრცელებს.

"რიონის ხეობის მცველების" განცხადება არის პირადად ჩემი და ჩემი თანამებრძოლების შეურაცხყოფა! ბევრ სამოქალაქო ინიციატივას შეუქცევია ზურგი ლგბტ ადამიანებისთვის, მაგრამ ასეთი შეურაცხყოფა არ მახსენდება!" — წერს კახაბერი ფეისბუქზე.

ნამახვანჰესის მშენებლობის მოწინააღმდეგე საზოგადოებრივი მოძრაობა რიონის ხეობის გადარჩენისთვის საინიციატივო ჯგუფი პრაიდის კვირეულთან დაკავშირებით ჰომოფობიურ განცხადებას ავრცელებს და ამბობს, რომ პრაიდი "დიდ დარტყმას აყენებს იმ ეროვნულ ერთობას, რომელსაც ასე უფრთხილდებოდნენ".

ორგანიზატორების მტკიცებით, შეუძლებელია, ვერ დაინახო, რომ ლგბტქ+ თემის "უფლებების დაცვის სახელით", ერთი მხრივ, პრაიდის ორგანიზატორთა მცირე ჯგუფი, აგრეთვე, ხელისუფლება და მთელი სპექტრი ოპოზიციური ძალებისა, წარმოჩინდებიან, როგორც "პოლიტიკურ დივიდენდებს მოწადინებული და მათთვის ძნელად მიღწევადი სამოქალქო ერთობის მოწინააღმდეგე ძალა, რომელიც არაფრად აგდებს საზოგადოების აბსოლუტური უმრავლესობის არჩევანს, რელიგიურ გრძნობებსა და ცხოვრების წესს".

"ასევე, უგულებელყოფენ ისინი განსხვავებული სექსუალური ორიენტაციის ადამიანებს, რომლებიც ცდილობენ სოციალურ ადაპტაციას საზოგადოებაში, სჭირდებათ სამსახური, მშვიდი ცხოვრება და თვითრეალიზაცია. ასეთი პრაიდი და მსგავსი აქტივობები კი ხელოვნურად ზრდის აგრესიას მათ მიმართ და ბევრად დაუცველი ხდება მათი პირადი სივრცე. სამწუხაროა, რომ ქართული საზოგადოება გარკვეულ ინდეფერენტულობას იჩენს მნიშვნელოვანი სახელმწიფოებრივი საკითხების მიმართ, მიდრეკილია, პერსონებისგან შექმნას კერპები და ასე აარიდოს თავი პასუხისმგებლობას", — ამბობენ ისინი.

მათი შეფასებით, ამით სარგებლობენ ცალკეული პოლიტიკური ფიგურები თუ ჯგუფები და კონკრეტული პრობლემებიდან ვექტორი გადააქვთ სხვა მიმართულებით.

"ჩვენი აზრით, თბილისი პრაიდის კვირეულის იდეა გარდა იმისა, რომ ერთმნიშვნელოვნად არის არატრადიციული ცხოვრების წესის პროპაგანდა, ეწინააღმდეგება საზოგადოებრივ აზრს, გამოხატავს მხოლოდ გარკვეული ჯგუფის ვიწრო ინტერესებს და მიმართულია სამოქალაქო ერთობის წინააღმდეგ. ამდენად, საზოგადოებრივი მოძრაობა რიონის ხეობის გადარჩენისთვის ცალსახად ემიჯნება თბილისი პრაიდის კვვირეულსა და მსგავს აქტივობებს, როგორც სახელმწიფოსა და საზოგადოების წინააღმდეგ მიმართულ ქმედებას", — აცხადებენ ისინი.

23 მაისს ნამახვანჰესის მოწინააღმდეგე აქტივისტმა, ვარლმა გოლეთიანმა ლგბტ თემის გამოხატვის თავისუფლებაზე საუბრისას განაცხადა, რომ პროტესტის გამოხატვის უფლება ნებისმიერ მოქალაქეს აქვს.

"აზრის გამოხატვის უფლება, რა თქმა უნდა, აქვს ყველა მოქალაქეს, მათ შორის პოლიტიკოსსაც. ამიტომ ვამბობთ, რომ თუ ჩვეულებრივი მოქალაქის ფარგლებს არ გაცდება მისი პროტესტი, რაც არის, შეუძლია აქ მოვიდეს და გააპროტესტოს, მეტი არაფრის თქმა შემიძლია", — თქვა მან.

24 მაისს ნამახვანჰესის აქციაზე აქტივისტს ლგბტ სამკლაურის გამო ძალადობრივი ჯგუფის წევრები დაუპირისპირდნენ. აქციის ორგანიზატორმა, ვარლამ გოლეთიანმა მომხდარი ინციდენტის შეფასებისას დაპირისპირების მიზეზად ლგბტ სამკლაური წარმოაჩინა და არა აგრესიული ჯგუფები. მან ზოგადად ძალადობა და იქ მომხდარი დაპირისპირება დაგმო, თუმცა განაცხადა, რომ "გამომწვევი მიზეზი" შეიძლება სიმბოლიკა გახდეს.

გოლეთიანს სიმბოლიკის გამოყენებაზე განცხადება აქამდეც გაუკეთებია, თუმცა პარტიული სიმბოლიკის გამოყენებას კრძალავდა და ამბობდა, რომ არ სურდა პროტესტი რომელიმე პარტიასთან ყოფილიყო ასოცირებული. 23 მაისს გამართულ აქციაზე მყოფებს მხოლოდ საქართველოს სახელმწიფო დროშებისა და პირველი რესპუბლიკის დროშების მიტანა შეეძლოთ. მათი დიდი ნაწილი ადგილზე მისული იყო ჯვრებით, ხატებითა და სხვა ქრისტიანული სიმბოლიკით.

გუშინ, პირველ ივლისს თბილისი პრაიდის კვირეული დაიწყო. პირველ ღონისძიებაზე ბრიტანული დოკუმენტური ფილმის პრეზენტაცია გაიმართა, რომელიც 2019 წლის პრაიდის მოვლენების შესახებ მოგვითხრობს.

ღონისძიებას რამდენიმე ათეული პირი ესწრებოდა, მათ შორის დიპლომატიური კორპუსის წარმომადგენლები — გერმანიისა და დიდი ბრიტანეთის ელჩები. ბრიტანეთის ელჩმა, მარკ კლეიტონმა დამსწრეებს სიტყვით მიმართა და ლგბტ თემს სოლიდარობა გამოუცხადა.

ღონისძიების პარალელურად შეკრებილნი იყვნენ ჰომოფობიური ჯგუფები, რომლებიც აგრესიულად იყვნენ განწყობილნი, ბოთლებს, ქვებსა და კვერცხებს ისროდნენ.

ადგილზე მობილიზებული იყო ათობით პოლიციელი. თუმცა პრაიდის ორგანიზატორები ამბობენ, რომ სამართალდამცავების ყოფნის მიუხედავად აშშ-ს საელჩოს წარმომადგენელს კვერცხი მოხვდა, ხოლო ერთ-ერთ სტუმარს დაარტყეს. ვითარება ადგილზე რამდენჯერმე დაიძაბა.

ფილმის ჩვენების შემდეგ უსაფრთხოების ზომებიდან გამომდინარე სტუმრებმა ტერიტორია პოლიციის კორდონის საშუალებით დატოვეს და შესასვლელთან მათ მიკროავტობუსები ელოდებოდათ. ამ ხნის განმავლობაში ჰომოფობიური ჯგუფების შეძახილები და ბოთლების სროლა არ წყდებოდა.