NATO-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ჯეიმს აპატურაის თქმით, საქართველომ საგრძნობლად წაიწია წინ NATO-ში ინტეგრაციის გზაზე. აღნიშნულზე აპატურაიმ საგარეო საქმეთა მინისტრთან, დავით ზალკალიანთან შეხვედრის შემდეგ ისაუბრა.

"ჩვენ ასევე გავაგრძელებთ საქართველოს დახმარებას რეფორმების განხორციელებისა და ნატოსთან დაახლოების მიმართულებით. მინდა აღვნიშნო, რომ ჩემი ამ რანგში მუშაობის 10 წლის მანძილზე, თუ შევადარებთ, იმ მდგომარეობას, რაც იყო მაშინ, როდესაც მე დავიწყე მუშაობა ამ პოზიციაზე და ახლა, აშკარაა, რომ საქართველომ საგრძნობლად წაიწია წინ ნატოში ინტეგრაციის გზაზე და ამის ბევრი მაგალითი შემიძლია დავასახელო. ჩემს ახალ პოზიციაზე დანიშვნის შემდეგაც გავაგრძელებ საქართველოსა და ჩვენი თანამშრომლობის მხარდაჭერას და ბედნიერი შევხდები საქართველოს, როდესაც ის გაივლის ღია კარის გზას", — ამბობს აპატურაი.

მისი თქმით, სამიტზე აღიარეს ის, თუ რამდენად შორს წავიდა საქართველო რეფორმების გატარებისა და NATO-სთან დაახლოების კუთხით.

"თუ შევადარებთ წინა სამიტის დეკლარაციას და ახლანდელს, აშკარად ჩანს რომ დოკუმენტი გახდა უფრო მკაფიო, დეტალებზე ორიენტირებული და ხდება გამოწვევების, მათ შორის საქართველოს ოკუპირებულ ტერიტორიებზე არსებული სირთულეების, მეტად აღიარება. ჩვენ დავსახეთ უფრო სიღრმისეული თანამშრომლობის დღის წესრიგი და ასევე შეხვედრაზე განვიხილეთ ამ მიმართულებით და ნატოს მეტი ჩართულობითა და მხარდაჭერით საქართველოსა და შავი ზღვის რეგიონის მიმართ, წინსვლის გზები. ამასთან, ჩვენ ვისაუბრეთ თანამშრომლობის ახალ მიმართულებებზე, მათ შორის კიბერუსაფრთხოებაზე. მინდა ასევე გამოვხატო ნატოს მხრიდან დაფასება და მადლიერება საქართველოს იმ მნიშვნელოვანი, აქტიური როლისთვის, რომელსაც ქვეყანა თამაშობს რეგიონში. აღსანიშნავია, სომხეთ-აზერბაიჯანის კონფლიქტის გადაჭრის მიმართულებით გაწეული დახმარება და ძალისხმევა უკეთესი რეგიონული თანამშრომლობისთვის. ამ მიმართულებით საქართველო წარმატებით თამაშობს უნიკალურ და გადამწყვეტ როლს. ამ როლს ვერც ერთი სხვა ქვეყანა ვერ ითამაშებს და ჩვენ მადლიერნი ვართ ამისთვის", — აცხადებს აპატურაი.

მისივე თქმით, მათთვის შავი ზღვის რეგიონში უსაფრთხოების სიტუაციის კუთხით თანამშრომლობის გაძლიერება აუცილებელია.

"ჩვენ ვიცით, რომ ეს სიტუაცია რუსეთის გამო უარესდება. ის გავლენას ახდენს ჩვენს მოკავშირეებსა და პარტნიორებზე. ჩვენ გავაგრძელებთ საქართველოს მხარდაჭერას და ინფორმაციის მიმოცვლას მიმდინარე მოვლენებთან დაკავშირებით", — ამბობს ის.

NATO-ს გენერალური მდივნის სპეციალური წარმომადგენელი სამხრეთ კავკასიასა და ცენტრალურ აზიაში, ჯეიმს აპატურაი ამჟამად თბილისში იმყოფება და ოფიციალურ შეხვედრებს მართავს.