პარლამენტის დეპუტატმა თამარ კორძაიამ პრემიერმინისტრს, ირაკლი ღარიბაშვილს მიმართა, რომ ოკუპირებულ ტერიტორიაზე მცხოვრებ აქტივისტს, თამარ მეარაყიშვილს მასთან შეხვედრა სურს.

"პარასკევს თქვენი გამოსვლის დროს მწერდა თამარ მეარაყიშვილი, რომელიც ცხოვრობს კონფლიქტურ საზღვართან. ოთხი წელია მიმდინარეობს მისი საქმე, ბრალდებულია სისხლის სამართლებრივად, მაგრამ პატიმრობაში არაა. ოთხი წელია ეს გრძელდება და მან მთხოვა, რომ სურს თქვენთან შეხვედრა და იქნებ ვინმე დაუკავშირდეს თქვენგან და წინასწარ მადლობა, თუ ამას გააკეთებთ", — განაცხადა კორძაიამ.

პრემიერმინისტრთან შეხვედრის მოთხოვნაზე საკუთარ ფეისბუქზე თამარ მერაყიშვილმაც ისაუბრა. მისი თქმით, წინააღმდეგ შემთხვევაში პროტესტის უკიდურეს ფორმას მიმართავს.

თამარ მეარაყიშვილი ახალგორელი ჟურნალისტი და სამოქალაქო აქტივისტია. მე-4 წელია მას სამხრეთ ოსეთის დე ფაქტო ხელისუფლების მხრიდან ანგარიშსწორების საფუძველზე მიმდინარე სისხლის სამართლის საქმის გამო, გადაადგილების თავისუფლება შეზღუდული აქვს. ახალგორის ჩაკეტვის შემდეგ, მის მონახულებას ოჯახის წევრებიც ვეღარ ახერხებენ.