რესპუბლიკური პარტიის ლიდერმა, ხათუნა სამნიძემ პარლამენტში პრემიერმინისტრს კიდევ ერთხელ მოუწოდა, მიეცა გარანტია ხალხისთვის, რომ ივლისში დაგეგმილი ღირსების მარშზე დაცულები იქნებიან.

"არ ველოდი თუ გამოტოვებდით ამ შეკითხვას, როგორც ვიცი, ჰომოფობი არ ბრძანდებით, ასეთი შთაბეჭდილება დამრჩა აქამდე, რაც გვისაუბრია ან რაზეც გვისაუბრია და გამიკვირდა, რომ ამ ტრიბუნიდან ერთი ფრაზა ვერ თქვით, რომ თითოეული მოქალაქის უფლება, შეკრების და გამოხატვის თავისუფლება იქნება დაცული. ქვეყნის პრემიერი ხართ, ევროპული ქვეყნის, ტოლერანტული ქვეყნის, როგორც ამბოდბით, მულტიკულტურული ქვეყნის, მრავალფეროვანი ქვეყნის. ასეთ ქვეყანაში არ უნდა გიჭირდეთ, არ უნდა გეშინოდეთ, ჩემი აზრით, ტრიბუნიდან თქვათ, რომ მე დავიცავ კონსტიტუციას, რადგან პრემიერი ხართ და კონსტიტუციის დაცვა თქვენი ვალია, არ მგონია, რომ ამის თქმა არ უნდა გიჭირდეთ. ძალიან გთხოვთ, მიეცით ამ ადამიანებს გარანტია, რომ ისინი დაცული იქნებიან შეკრების დროს. ეს არის მათი კონსტიტუციური უფლება და ჩვენ ვალდებული ვართ, პოლიტიკოსები, მთელი ქვეყანა, ჩვენი უფლებამოსილების ფარგლებში დავიცვათ ეს ადამიანები მუქარებისგან", — განაცხადა სამნიძემ.

აღსანიშნავია, რომ სამნიძემ პრემიერმინისტრს წლიური ანგარიშის წარდგენის შემდეგ მოუწოდა ამ განცხადების გაკეთებისკენ, თუმცა დეპუტატების კითხვებზე პასუხისას ღარიბაშვილმა ამ კითხვას არ უპასუხა, სამნიძემ კი დამაზუსტებელ კითხვაზე აღნიშნული გაუმეორა.