ქართული კინოს გულშემატკივრებისთვის მშვენიერი სიახლე გვაქვს: თენგიზ აბულაძის ფილმი მონანიება 34 წლის შემდეგ კანის საერთაშორისო კინოფესტივალზე ბრუნდება! ფილმის პრემიერა ფესტივალზე 1987 წელს შედგა.

მონანიება კინოფესტივალზე სექციაში "კანის კლასიკა" იქნება წარმოდგენილი. აღნიშნული სექცია 2004 წლიდან არსებობს და კინოს ისტორიის უმნიშვნელოვანესი სურათების ხელახლა, ამჯერად ციფრულ ფორმატში ჩვენებას ისახავს მიზნად.

იმის გათვალისწინებით, რომ ფესტივალზე ფილმებს ციფრული ფორმატით აჩვენებენ, ეროვნულმა კინოცენტრმა საქართველოს განათლების, მეცნიერების, კულტურისა და სპორტის სამინისტროს მხარდაჭერით ფილმის რესტავრაცია 2020 წელს დაიწყო.

მონანიება 1984 წელს გამოვიდა და აქტუალურობას დღემდე არ კარგავს. კანის კინოფესტივალზე ფილმმა 3 ჯილდო მიიღო: ჟიურის სპეციალური პრიზი, კინოპრესის საერთაშორისო ფედერაციის პრემია "ფიპრესი" და კათოლიკური ეკლესიის ჟიურის პრიზი ჰუმანიზმისათვის. აღსანიშნავია ისიც, რომ ფილმმა 1988 წელს ოქროს გლობუსზე საუკეთესო უცხოენოვანი ფილმის ნომინაციაც მოიპოვა. ფილმში მთავარ როლებს ავთანდილ მახარაძე, ია ნინიძე, მერაბ ნინიძე, ზეინაბ ბოცვაძე, კახი კავსაძე, ქეთევან აბულაძე, ლეო ანთაძე და სხვები ასრულებენ.

ამავე თემაზე: