პარლამენტმა მთავრობას კოვიდშეზღუდვების დაწესების უფლება 2022 წლის 1 იანვრამდე გაუხანგრძლივა. აღნიშნული ცვლილების პროექტი დღეს დაჩქარებული წესით განიხილეს პლენარულ სხდომაზე. საკითხს კენჭისყრაზე 78 მომხრე და 22 წინააღმდეგი ჰყავდა.

მთავრობისთვის შეზღუდვების ერთპიროვნულად დაწესების უფლება უკვე მეორედ უხანგრძლივდება. ეს უფლება პარლამენტმა მთავრობას 2020 წლის მაისის ბოლოს მიანიჭა. 2020 წლის დეკემბერში უფლებამოსილება 6 თვით გაუხანგრძლივა, რაც 1 ივლისს იწურება.

2020 წლის მაისში მიღებული კანონი მთავრობას უფლებამოსილებას ანიჭებს, საზოგადოებრივი ჯანმრთელობის უსაფრთხოების მოტივით საკარანტინო ზომები პარლამენტის თანხმობის გარეშე გამოიყენოს, რასაც რიგი საკონსტიტუციო უფლებებისა და თავისუფლებების, მათ შორის, შეკრების თავისუფლების, გადაადგილების თავისუფლების, საკუთრების, ეკონომიკური და შრობითი უფლებების შეზღუდვები მოჰყვება.

მიუხედავად იმისა, რომ პარლამენტის ეს გადაწყვეტილება ავტორიტეტული არასამთავრობო ორგანიზაციების და ოპოზიციის კრიტიკის საგანი გახდა, რადგან ანტიკონსტიტუციურად მიიჩნიეს, დღემდე ძალაშია და პარლამენტი მთავრობას უფლებას კვლავ უგრძელებს.