ქართველი რეჟისორი რატი წითელაძე მსოფლიოს მაშტაბით 250-ზე მეტი კანდიდატიდან კანის კინოფესტივალის ერთ-ერთ პროგრამაში Cinéfondation's The Residence 2017-ზე ექვს საუკეთესო რეჟისორს შორის მოხვდა.

რაც გულისხმობ იმას, რომ რატი ექვსი თვის მანძილზე პარიზში ფილმის, ცარიელი სახლის განვითარებაზე იმუშავებს და ამავდროულად უმნიშვნელოვანეს საერთაშორისო ფესტივალებზე წარადგენს: Locarno, Guanajuato Film Festival, Rotterdam, და Festival de Cannes.

თუმცა სამწუხაროა ის, რომ როგორც გაირკვა რეჟისორს საკმარისი თანხები არ აქვს ფილმზე მუშაობის გასაგრძელებლად.

"ცარიელი სახლი" ავტობიოგრაფიული ისტორიაა, რომლის სცენარის ავტორიც ნინო ვარსიმაშვილია.

ფილმის სიუჟეტი თბილისში 90-იანი წლების სამოქალაქო ომის დროს ვითარდება, თუმცა ფილმი არის იმ ომის შესახებ, რომელიც ოჯახში მძვინვარებს. 11 წლის ნინო სრულყოფილ ოჯახზე ოცნებობს. ეს ოცნება მაშინ უხდება, როცა მამამისი, 7-წლიანი პატიმრობის შემდეგ, თავისუფლდება. თუმცა, ყველაფერი ისე არ ხდება, როგორც წარმოედგინა. ეს მის ცხოვრებასა და ოჯახს მთლიანად და სამუდამოდ ცვლის.

"ცარიელი სახლი" უკვე შერჩეული იყო 4 საუკეთესო პროექტს შორის გერმანიის 64th International Film Festival Mannheim-Heidelberg-ზე, 2017 წელს კი სანდენსის სცენარისტთა ლაბორატორიის შორტლისტში მოხვდა და შერჩეული იყო რვა პროექტს შორის კიევის რიგით 45-ე საერთაშორისო კინოფესტივალზე.

"უკვე 3 წელია ამ ფილმზე ვმუშაობთ და მთელი გულით გვჯერა, რომ ეს არის ამბავი, რომელიც ყველამ უნდა გაიგოს. მაგრამ სამწუხაროდ ამ ეტაპზე არანაირი ფინანსური მხარდაჭერა არ გვაქვს. ჩვენი წინა ნამუშევარი "დედა" პირადი ხარჯებით გადავიღეთ და ფილმი 200-მდე საერთაშორისო ფესტივალზე, 50-ზე მეტ ქვეყანაში აჩვენეს. ჩემი დიდი სურვილია, რომ ეს ფილმი ქართული ნაწარმოები იყოს, მაგრამ თქვენი მხარდაჭერის გარეშე მე ამას ვერ შევძლებ, მე ამ ფილმს ვერ გადავიღებ. ჩვენი მიზანია საზოგადოებაში სოციალური ცვლილებების ხელშეწყობა, ოჯახში ძალადობის ფაქტების აღმოფხვრა და ქართული საზოგადოებისთვის ქალთა და ბავშვთა უფლებების დისკრიმინაციის ნაკლებად ხილული ფორმების გათვალსაჩინოება.", - ამბობს რატი წითელაძე.

თუ გსურთ, რომ გახდეთ პროექტის მნიშვნელოვანი ნაწილი და თუნდაც პატარა წვლილი შეიტანოთ ფილმის შექმნაში:

საბანკო ანგარიში:
ლიბერთი ბანკი
GE83LB0711194436896000
რატი წითელაძე