სახალხო დამცველის განცხადებით, შინაგან საქმეთა სამინისტრომ უნდა წარმოადგინოს ინფორმაცია, ღირსების მარშის უსაფრთხოდ ჩასატარებლად რა გააკეთა ამდენი წლის განმავლობაში. ნინო ლომჯარიას თქმით, "არ შეიძლება, ყოველწლიურად გვესმოდეს, რომ არსებობს კოკრეტული საფრთხეები".

"სახალხო დამცველი წლებია საუბრობს პრაქტიკულად, 2012-13 წლებიდან, როდესაც ძალადობრივ ქმედებებს ჰქონდა ადგილი იმ პირების მიმართ, რომლებიც თანასწორობის საკითხებზე გამოვიდნენ ქუჩაში და სურდათ საკუთარი აზრის გამოხატვა.

ბოლო წლებია ხელი ეშლება ლგბტ თემს და მის მხარდამჭერებს საკუთარი კონსტიტუციური უფლების გამოხატვის, შეკრებისა და მანიფესტაციის თავისუფლად განხორციელების რეალიზაციაში. ვფიქრობ, შინაგან საქმეთა სამინისტრომ უნდა წარმოადგინოს ინფორმაცია, რა გააკეთა ამდენი წლის განმავლობაში, როდესაც ასეთი საფრთხე მუდმივად არსებობს, რომ ეს საფრთხეები იყოს დაზღვეული", — ნინო განაცხადა ლომჯარიამ.

მისივე თქმით, თუ საფრთხეები არსებობს, ცნობილი უნდა გახდეს, პრევენციისთვის სამართალდამცველი ორგანოები რას აკეთებენ, რათა მის მოქალაქეებს შეკრებისა და გამოხატვის თავისუფლება ჰქონდეთ.

"მით უმეტეს, რომ საფრთხეების შესახებ წინასწარ არის გაცხადებული და ამ შემთხვევაში პრევენციული ღონისძებების გატარება უფრო მეტად რეალისტურია, ამიტომ ჩვენ ველოდებით, რომ სამართალდამცავი ორგანოები პრევენციულად უზრუნველყოფენ ჩვენი მოქალაქეების გამოხატვის თავისუფლების დაცვას", — განაცხადა ომბუდსმენმა დეპუტატ თამარ კორძაის კითხვის პასუხად, ჩატარდეს უნდა თუ არა ღირსების მარში.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართელი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.