სტამბოლში მსოფლიო ჰუმანიტარული სამიტის პლენარულ სესიაზე სიტყვით გამოსვლისას გიორგი მარგველაშვილმა განაცხადა, რომ საქართველო მზადაა მსოფლიო გამოწვევების დაძლევის საკითხებში საკუთარი წვლილი შეიტანოს:

"საქართველომ უკვე მიიღო 3,500-მდე თავშესაფართა მაძიებელი: ერაყიდან, უკრაინიდან, სირიიდან, ნიგერიიდან, კოტ დივუარიდან, სომალიდან - მიმდინარე ლტოლვილთა კრიზისის შედეგად".

საქართველოს პრეზიდენტის თქმით, საქართველო მზადაა თავის უნივერსიტეტებში სხვადასხვა საგანმანათლებლო პროგრამებზე მოიწვიოს გარკვეული რაოდენობის სტუდენტები.

"ჩვენ მზად ვართ განვიხილოთ ეს ინიციატივა, იმის გათვალისწინებით, რომ ჩვენ ვართ შეზღუდული რესურსების მქონე პატარა ქვეყანა, კონფლიქტებით გამოწვეული მნიშვნელოვანი ტვირთით".

საქართველოს პრეზიდენტის განცხადებით, საქართველო ერთგული რჩება და აგრძელებს სისხლის სამართლის საერთაშორისო სასამართლოს მხარდაჭერას სამართლიანობის უზრუნველყოფის და დაუსჯელობის აღკვეთის საქმეში.

პლენარულ სესიაზე გამოსვლისას მარგველაშვილმა რუსეთისგან არსებულ საფრთხეებზეც ისაუბრა.