ისრაელი აცხადებს, რომ ღაზის სექტორში ჰამასის ობიექტებზე იერიში მიიტანა მას შემდეგ, რაც ამ უკანასკნელმა ხანძარგამჩენი ბუშტები გაუშვა. გამთენიისას ღაზის სექტორში აფეთქების ხმა ისმოდა.

ისრაელის სახანძრო სამსახურის განცხადებით, სამშაბათს ღაზის სექტორიდან რამდენიმე ბუშტი გაუშვეს, რამაც ისრაელის სამხრეთით მინდვრებზე 20-მდე ხანძარი გააჩინა. თავდაცვის ძალებში აცხადებენ, რომ ობიექტებში, რომლებშიც მათ იერიში მიიტანეს, "ტერორისტული საქმიანობა" ხორციელდებოდა.

ჯერჯერობით უცნობია მოყვა თუ არა მსხვერპლი ავიაიერიშს.

ფოტო: Getty Images

მაისში 11-დღიანი შეიარაღებული შეტაკებების შემდეგ ეს პირველი შემთხვევაა, როცა კონფლიქტი კვლავ გაღვივდა. ამას წინ უსწრებდა აღმოსავლეთ იერუსალიმში იუდეველი ნაციონალისტების მარში, რასაც ჰამასის მხრიდან მუქარა მოჰყვა. მარშის დაშლისას 30 პალესტინელი დაშავდა და 17 პირი დააკავეს. პოლიციამ რეზინის ტყვიები გამოიყენა.